क्षयरोग निवारण संस्था ख्वपया जिल्लासभा
थिमि – नेपाल क्षयरोग निवारण संस्था ख्वप जिल्ला शाखाया ३९ क्वःगु जिल्लासभा जुल । संस्थाया सभापति राम सिख्वःया सभापतित्वय् जूगु सभाया उलेज्या प्रदेश नं ३ या प्रदेशसभा सदस्य डा. राजेन्द्रमान श्रेष्ठं यानादीगु खः ।
ज्याझ्वलय् गंल्वय् नियन्त्रणया निंतिं संचार क्षेत्रपाखें विशेष योगदान बिउगु धासें थेम्मृङ लय्पौ, नेपाःया थीथी जिल्लाय् गंल्वय् व थीथी ल्वय्यात कयाः निःशुल्क स्वास्थ्य शिविर संचालन यासे असहाय व भुखाचं पीडित जूपिंत राहत बीगु, जन्मजात अपांग जूपिंत ह्विल चियर इनेगु लगायतया सामाजिक ज्याय् योगदान बियादीम्ह समाजसेवी दीपिका श्रेष्ठयात दोसल्लां न्ययेकाः सम्मान याःगु खः ।
अथे हे संस्थायात थीथी कथं ग्वाहालि याःगु संघसंस्थायात कदरपत्र नं लःल्हाःगु ज्याझ्वलय् गंल्वचं कयाः नियमित रुपं वासः नयाच्वंपिं प्यम्ह ल्वगियात पोषण नं इना बिउगु खः । संस्थाया सचिव राजेश्वरी शिल्पकारं आर्थिक दँ ०७४÷७५ या वार्षिक प्रतिवेदन नापं ०७५÷७६या भावी ज्याझ्वः न्ह्यब्वयादीगु उगु ज्याझ्वलय् संस्थाया कोषाध्यक्ष व लेखापरीक्षकया प्रतिवेदन नं न्ह्यब्वःगु खः ।
ज्याझ्वलय् जिल्ला समन्वय समिति ख्वपया प्रमुख नवराज गेलाल, संस्थाया संस्थापक सचिवलिसें पुलांम्ह महासचिव धनमान श्रेष्ठ, संस्थापक दुजः नापं कानूनविद् बाबुराजा जोशी, निवर्तमान सभापति बाबुकाजी श्रेष्ठं नुगःखँ तयादीगु खः ।
LEAVE YOUR COMMENTS