मेडिकल विद्यार्थीपाखें परीक्षा बहिष्कार

येँ – अप्वः काःगु शुल्क लित बीमाःगु माग यासें मेडिकल कलेजया विद्यार्थीतय्सं न्हापांगु परीक्षा बहिष्कार याःगु दु । नेशनल मेडिकल कलेज, चितवन मेडिकल कलेज, जानकी मेडिकल कलेज व युनिभर्सल कलेज अफ मेडिकल साइन्सय् एमबीबीएस, बीडीएस व नर्सिङ अध्ययन यानाच्वंपिं विद्यार्थीपिंसं परीक्षा बहिष्कार याःगु खः ।

चितवन मेडिकल कलेजया विद्यार्थीपिसं सतकय् नाराबाजी यानाः प्रवेश पत्र नं च्याकाबिउगु दु । वंगु मंसिर १७ गते सरकार व निजी मेडिकल कलेज दथुइ जूगु सम्झौताय् एमबीबीएस व बीडीएस संकाय अन्तर्गतया न्हापांगु व निगूगु दँय् अध्ययन यानाच्वंपिं विद्यार्थीया जक शुल्क समायोजना जुइगु सहमति जूगु खः ।

उगु सहमतिं फुक्कं विद्यार्थीया माग पूमवनीगु धासें उमिसं परीक्षा बहिष्कार याःगु खः । चिकित्सा शिक्षा संघर्ष समितिया प्रवक्ता सुजन कडेरियां मेगु विकल्प मदुगुलिं परीक्षा बहिष्कार यायेमाःगु खँ धयादिल । वय्कलं धयादी, ‘थःगु मागया निंतिं परीक्षा बहिष्कार स्वयां तःधंगु त्याग छु जुइ फइ ? जिमिसं ला थःगु भविष्य दाउलय् तया ।’

सरकारं वार्ता यानाः माग पूवंकूसा जक हाकनं जुइगु परीक्षाय् च्वनेगु संघर्ष समितिं निर्णय याःगु दु । अझ नं सरकार गम्भीर मजुल धाःसा राजधानी केन्द्रीत आन्दोलन यायेगु तयारी जुयाच्वंगु जानकारी बियादिसें प्रवक्ता कडेरियां थःपिंसं यानाच्वनागु भद्र आन्दोलनयात नं सरकारं बेवास्ता यात धाःसा कलेजया विद्यार्थीतय्त येँय् हयाः आन्दोलन यायेगु ख्याच्वः नं बियादीगु दु ।

सरकार व निजी मेडिकल कलेजया सम्झौता पतिइ एमबीबीएस व बीडीएस संकाय अन्तर्गतया न्हापांगु व निगूगु दँय् ब्वनाच्वंपिं विद्यार्थीया जक शुल्क समायोजना यायेगु सहमति दु । तर विद्यार्थीतय्सं धाःसा उगु सहमति सरकारं विद्यार्थी लिसे सहमति मयासे मेडिकल कलेजयात फाइदा जुइ कथं याःगु द्वपं बियाच्वंगु दु ।