वडायात निजी फोहोर संकलकतय् ख्याच्वः

येँ – बांलाक ज्या मयाः धासें येँ मनपा वडा नं. २ या वडा कार्यालयं छगू निजी फोहोर संकलन संस्थायात चीका छ्वःगु खँयात कयाः फोहोरमैला संकलन याइपिं निजी व्यवसायीतय् संगठन ‘फोहरमैला व्यवस्थापन संघ नेपालं’ वडा कार्यालययात हे ख्याच्वः बिउगु दु ।

येँया वडा नं. २ लागाय् फोहोरमैला संकलनया ज्या याना वयाच्वंगु के.पी. क्लिनिङ सर्भिस प्रा.लि.यात तःक्वःमछि बांलाक ज्या यायेगु लागिं इनाप यानाः नं वास्ता मयासेंलि वडा कार्यालयं जिम्मेवारीं हे लिकया बिउगु खः । तर फोहोरमैला संकलकतय् संघं अथे बांलाक ज्या मयाःगु संस्थायात कारवाही यायेगु पलेसा वयात हानं ज्याय् तयेमाः धकाः दबाब बिसें आन्दोलनया समेत ख्याच्वः बिउगु खः ।

वडा नंं. २ या वडा अध्यक्ष राजेन्द्र श्रेष्ठं कनादी कथं केपी क्लिनिङ सर्भिसं तःदँ न्ह्यवंनिसें हे वडाय् बांलाक फोहोर मुनेगु ज्या मयानाच्वंगु खः । वयालिसे छन्हु अतः फोहोर मुं वयेगु सहमति जूगु खःसां वं झिंन्यान्हुया छक्वः जक फोहोर मुनेगु ज्या यानाच्वंगु खः । थुकिं यानाः वडावासीत आक्रोशित जुयाः वडाय् नं तःक्वःमछि ल्वाः वयेधुंकूगु दु ।

वडावासीत ल्वाः वल धकाः थम्हं उगु सर्भिसयात मौलिक रुपं धयां नं मजियाः तःक्वःमछि लिखित समेत धयां नं वास्ता हे मयासेंलि आः वयात जिम्मेवारीं चीकागु खँ नं वडा अध्यक्ष श्रेष्ठं कनादिल । जिम्मेवारीं चीकेवं उगु सर्भिसयात पुनः जिम्मेवारी बीमाः धासें फोहरमैला व्यवस्थापन संघं वडायात पौ छ्वया हःगु खः ।

संघं छ्वया हःगु पती वडाया निर्देशन तत्काल कार्यान्वयन मयायेत नं ‘इनाप’ यानातःगु दु । तर वडा अध्यक्ष श्रेष्ठं धाःसा आः थःपिं छुं हे हालतय् उगु सर्भिसयात ज्याय् तयेगु पक्षय् मदुगु खँ कनादीगु दु । आः थःगु वडाय् फोहोरमैला संकलनया व्यवस्था थःपिंसं हे यायेगु धासें सुयां ख्याच्वःपाखें थः लिमचिलेगु खँ नं वय्कलं कनादीगु दु ।

फोहोरमैलाय् न्हापा महानगरपालिका दुने यक्व राजनीति जुल धकाः निजी क्षेत्रयात जिम्मा बीगु ज्या जूगु खःसा आः निजी क्षेत्रं नं राजनीति यायेत सना हःगु आशंका नं वय्कलं यानादिल । थथे थीथी थासं वइगु ख्याच्वः खनाः ग्याना जक च्वनेगु खःसा वडा व महानगरपालिकां ज्या याये फइ मखु धासें वय्कलं वडाया फोहोर वडावासी हे जानाः मुनेगु तयारी जुयाच्वंगु खँ नं कनादिल ।

सम्बन्धित बुखँ

LEAVE YOUR COMMENTS