हिन्दू राष्ट्रया लागिं कांग्रेसय् लबिङ

येँ – महासमिति बैठकया लागिं येँय् मुं वःपिं कांग्रेसया छथ्वः महासमिति दुजःत संविधानय् व्यवस्था यानातःगु धर्म निरपेक्षताया धारा संशोधन याकेगु लागिं सक्रिय जूगु दु । धर्म निरपेक्ष धइगु उगु धारायात संशोधन यानाः हिन्दू राष्ट्र हे कायम याकेगु लागिं उमिसं हस्ताक्षर संकलन समेत शुरु याःगु दु ।

राजधानी येँ लगायत थीथी जिल्लां वयाच्वंपिं महासमिति दुजःतय्सं शुक्रवाःनिसें हे हस्ताक्षर संकलन याःगु खःसा म्हिगः तक उकी न्यासःम्ह महासमिति दुजःतय्सं हस्ताक्षर यायेधुंकूगु खँ धाःगु दु । थुमिसं येँय् छगू बिस्कं भेला सःताः नेपाःयात हिन्दू राष्ट्र हे दयेकेमाः धासें उकिया लागिं नेपाली कांग्रेसं हे पहल यायेमाःगु माग नं उमिसं याःगु दु ।

उमिसं थ्व मुद्दायात महासमिति बैठकया एजेण्डा दयेकेत समेत माग याःगु दु । कांग्रेसया महामन्त्री शशांक कोइरालां नं छुं न्हि न्ह्यः हिन्दू राष्ट्रया पक्षय् थःगु बिचाः तयादीगु खः ।नेपाःयात हिन्दू राष्ट्र हे कायम यायेमाः धकाः कांग्रेसया मदुम्ह नेता खुमबहादुर खड्कां नं अभियान हे शुरु याःगु खःसां वय्कः मदयेधुंकाः थ्व अभियान अथें दित ।

हिन्दू राष्ट्रया लागिं अभियान न्ह्याकाच्वंपिं कांग्रेस कार्यकर्तातय्त दुनें दुनें पुलांम्ह जुजु ज्ञानेन्द्र शाहं नं साथ बियाच्वंगु सूत्रया दावी दु । मदुम्ह खुमबहादुर खड्कां थुकिया लागिं पुलांम्ह जुजु शाहलिसे नं स्वापू तयेगु ज्या यानादीगु खः ।

 

सम्बन्धित बुखँ

LEAVE YOUR COMMENTS