येँ महानगरपालिकाया नीति : हरियाली प्रवद्र्धन, सहरी सौन्दर्यता व पार्क निर्माण

येँ (नेपालभाषा टाइम्स) – येँ महानगरपालिकां महानगर लागा दुने खुल्ला क्षेत्रया विकास व हरियाली प्रवद्र्धन यायेगु ज्यायात प्रमुख प्राथमिकता बिउगु दु। येँ मनपां महानगर क्षेत्र दुने अतिक्रमण जुयाच्वंगु सार्वजनिक जग्गाया पहिचान यानाः उकियात संरक्षण यायेकथं उगु ज्यायात प्राथमिकता बियाः न्ह्याकूगु दु ।

येँ मनपां आर्थिक दँ ०७७-७८या बजेटय् थःगु क्षेत्र दुनेया सार्वजनिक जग्गा पहिचान यानाः उकिया संरक्षण व खुल्ला क्षेत्र कायम यानाः उकिया विकासया निंतिं म्होतिं नं नीगू लाखनिसें खुगू करोड तकया ३० गू स्वयां अप्वः पार्क निर्माण यायेगु योजना नं न्ह्यःने हःगु दु ।

येँ महानगरपालिका प्रमुख विद्यासुन्दर शाक्यं महानगर क्षेत्र दुने अतिक्रमण जुयाच्वंगु सार्वजनिक जग्गा संरक्षण यानाः खुल्ला क्षेत्रकथं विकास यायेगु उद्देश्यं थुगु दँया बजेटय् पार्क निर्माण, हरियाली प्रवद्र्धन यायेगु लगायतया ज्यायात प्राथमिकत बियागु खँ धयादीगु दु ।

हरियाली प्रवद्र्धन यायेगु, सहरी सौन्दर्यता अप्वयेकेगु, पार्क निर्माण यायेगु थेंज्याःगु ज्यायात महानगरपालिकाया नीति हे जूगु धासें येँ मनपा प्रमुख शाक्यं धयादिल, ‘जिमिसं खुल्ला थाय् व सार्वजनिक जग्गा संरक्षण यायेगु, ऐतिहासिक एवं वातावरणीय दृष्टिं महत्वपूर्ण थाय्या संरक्षण व संवद्र्धन यायेगु ज्यायात प्राथमिकता बियागु दु।’

‘येँ महानगर क्षेत्र छगू ख्वातुगु वस्तीं जायाच्वंगु सहर खः । उकिं थन चाःहिलेत व खुल्ला थाय्या आनन्द कायेत जिमिसं अज्याःगु थाय्या संरक्षण व सदुपयोग यायेगु योजना न्ह्यःने हयागु दु,’ येँ मनपा प्रमुख शाक्यं धयादिल, ‘हरियाली अप्वयेकेगु नापनापं भूमिगत लःया नं भण्डारया निंतिं रिचार्ज काठमाडौं अभियानयात जिमिसं प्राथमिकता बियागु दु ।’

येँ मनपां वइगु आर्थिक दँया बजेटय् महानगर जेष्ठ नागरिक पार्क, स्ट्रिट फुड पार्क, बाल उद्यान, जेष्ठ नागरिक आश्रम, सहिद पार्क, चेसपार्क, महानगर बाज्याअजि पार्क, मिसामैत्री पार्क निर्माण लगायतया योजना दुथ्याकातःगु दु। थुगु योजनाकथं येँ मनपा १५ वडाय् सहीद पार्कया निंतिं छगू करोड, वडा नं. ४ य् नरबुद्ध पार्कया निंतिं छगू करोड न्यय्गू लाख, कुलेश्वर आवास क्षेत्रया सार्वजनिक जग्गाय् दयेकीगु पार्कयात ५० गू लाख, वडा नं. १४ या ज्ञानतीर्थ पार्कया निंतिं ४० लाख,हिजाखुसि दोभानया सार्वजनिक पार्कया निंतिं २५ गू लाख विनियोजन याःगु दु ।

थुकथं हे रानीपुखू क्षेत्रया विस्तारया निंतिं १ गू करोड, यपिंख्यः परिसर व गाःहितिया निंतिं ३० गू लाख, ल्हुतिया पार्क विकास व स्वमिब पुलया निंतिं बहुवर्षीय योजनाय् १ गू करोड, थौंकन्हय् अल्पकालीन हरियालीसहितया आइल्याण्ड निर्मण यानातःगु तीनकुनेय् आधुनिक बुद्ध पार्कया निंतिं डीपीआर तयार यायेत १ गू करोड विनियोजन याःगु दु ।

थुकथं हे येँ मनपां करःखुसि, सामाखुसि, बःखु, महाद्यः खुसि, बागमति, विष्णुमति खुसि सिथय् च्वंगु सार्वजनिक जग्गा संरक्षण, हरियाली प्रवद्र्धन व खुसि नियन्त्रणया निंतिं करिब ७ गू करोड बजेट विनियोजन याःगु दु । महानगर लागा दुने सार्वजनिक जग्गा संरक्षण यानाः हारियाली प्रवद्र्धन यायेगु ल्याखं पार्क निर्माण यायेगु निंतिं विनियोजन याःगु बजेट नकतिनि क्वचाःगु नगरसभां पारित याःगु खः ।

लुमंकेबहजू, चालु आर्थिक दँय् नं महानगर दुनेया छगू दर्जन थासय् पार्क निर्माण यायेगु ज्या जूगु दु। चालु आर्थिक दँय् येँ मनपा २३ वडाय् सहीद धर्मभक्त माथेमा पार्क, ३१ वडाय् हनुमान पार्क, गणेश मन्दिर पार्क, लोकेश्वर महाद्यः परिसरय् पार्क निर्माण सम्पन्न जुइधुंकूगु दु। अथे हे वडा नं ४ य् टुँडालदेवी पार्क, टुसाल पार्क, थीथी वडाय् मदन भण्डारी पार्क, बाँसबारीइ इको पार्क निर्माणया न्हापांगु चरणया ज्या सिधयेधुंकूगु दु ।

थ्व झ्वलय् चालु आर्थिक दँय् न्ह्यःखा पार्क, शान्ति नमूना पार्क, गौरीघाट हरियाली पार्क, धोबीखोला पार्क, त्रिपुरेश्वर ज्येष्ठ नागरिक पार्क, कुलेश्वर पार्क, कुलेश्वर आवास क्षेत्र पार्क, बागमती नगर पार्क, कुमारी पार्क, रानीबारी पोर्पा अजिमा पार्क, वडा नम्बर-२१ मा लगं पार्क, कमल पोखरी पार्क निर्माणया ज्या नं न्ह्याकेधुंकूगु दु ।

थुकीमध्ये बागमति पार्क ७ गू करोड व लगं पार्क ६ गू करोड व कमलपुखू गुरुयोजना ७ गू करोडया लगानीइ निर्माण जुयाच्वंगु दु। थ्व बाहेकं येँ महानगरपालिकां जःखः च्वंगु थीथी स्थानीय निकायय् नं नगर-नगर साझेदारी ज्याझ्वः अन्तर्गत हरियाली प्रवद्र्धन यायेगुलिइ बः बिया वयाच्वंगु दु ।

थ्व अन्तर्गत येँ जिल्लाया झिगू व मध्यपुर थिमि नगरपालिकाय् नं सम्झौता यानाः पार्क निर्माणया ज्या न्ह्याकाच्वनागु येँ महानगरपालिकां न्ह्यथंगु दु । येँ मनपां बिउगु जानकारीकथं येँ जिल्लाया तोखा, किपू, भुइजःसि, तारकेश्वर, नागार्जुन, चन्द्रगिरि, दक्षिणकाली, गोकर्णेश्वर, कागेश्वरी मनोहरा, शंखरापुर सक्वय् नं पार्क व उद्यान निर्माण जुयाच्वंगु दु ।

येँ मनपां थुपिं दक्वं नगरपालिकाय् निर्माण जुयाच्वंगु पार्कया निंतिं प्रति नगरपालिका छगू करोडया ल्याखं ग्वाहालि याःगु खः ।