पृथ्वी दिवस ‘हाकुगु न्हि’ कथं हन

येँ (नेपालभाषा टाइम्स) – पृथ्वीनारायण शाहया बुन्हिया झ्वलय् म्हिगः किपुली पृथ्वी नारायण शाहयात थुकलं बीगु ज्याझ्वः जुल । जनजाति आन्दोलनया कार्यकर्तातय्सं मुनाः अन छ्याकः ल्वहँतय् ई फायेगु ज्या याःगु खः । तर प्रहरी परिचालन यानाः अन ई फायेगु ज्याझ्वः धाःसा प्रभावित जुल । पुलांपिं पञ्चतय्सं म्हिगःया न्हियात राष्ट्रिय एकता दिवसया रूपय् हनेगु याःसां आदिवासी जनजातितय्सं धाःसा म्हिगः किपुली ‘हाकुगु दिवस’ धकाः च्वयातःगु ब्यानर ब्वयाः ज्याझ्वः याःगु खः ।

अथे हे पुलांपिं पञ्च व जुजुवादीतय्सं म्हिगः पिकाःगु र्‍यालीइ नं प्रहरीं हस्तक्षेप याःगु दु । उमिसं सिंहदरवार न्ह्यःने च्वंगु पृथ्वीनारायण शाहया झ्वाताय् स्वां देछायेगु ज्याझ्वः याःगु खः । उगु इलय् उमिसं गणतन्त्रया विरोध यासें राजतन्त्र जिन्दावाद धकाः नारा थ्वयेकूगु खः । तर र्‍याली पिकाःपिंसं अथे नारा थ्वयेकेवं उमित प्रहरीं लाठीचार्ज याःगु खः । उकी लानाः छम्ह प्रदर्शनकारीया छ्यं तज्याःगु खँ धाःगु दु। उगु र्‍यालीइ कलाकार मनिषा कोइराला नं दुगु खः ।

प्रहरी हस्तक्षेप लिपा उमिसं गणतन्त्रवादी होशियार, राजतन्त्र जिन्दावाद, हिन्दू राष्ट्र जिन्दावाद धकाः नारा थ्वयेकूगु खः । उमिगु प्रदर्शनं यानाः सिंहदरवार न्ह्यःने यातायात अवरुद्ध जूगु खः ।