भारतीय न्यूज च्यानल बन्द, भारतीय मिडियाविरुद्ध कानुनी उपचार मालीगु

येँ – नेपालय् विदेशी च्यानल वितरण याना वयाच्वंपिं मल्टि सिस्टम अपरेटर (एमएसओ)तय्सं नेपालय् भारतीय न्युज च्यानल प्रसारण बन्द याःगु दु । उमिसं म्हिगः सनिलय् निसें दुरदर्शन बाहेक फुक्कं भारतीय न्युज च्यानल बन्द याःगु खः । भारतीय न्युज च्यानलतय्सं नेपाःया बारे म्वाःमदुगु प्रचार याःगु धासें न्युज च्यानल बन्द याःगु खः ।

थ्वहे झ्वलय् भारतीय सञ्चार माध्यमं नेपाः व नेपाःया प्रधानमन्त्री केपी ओलीयात लाक्वपाक्व धयाः पित बियाच्वंगु समाचारयात कयाः सरकारं कानुनी उपचार मालेगु खँ धाःगु दु । सरकारया प्रवक्ता युवराज खतिवडां म्हिगः नियमित पत्रकार सम्मेलनया झ्वलय् थ्व खँ धयादीगु खः ।

प्रवक्ता खतिवडां स्वदेशी जुइमा वा विदेशी जुइमा, सञ्चार माध्यमं सत्यताया आधारय् समाचार सम्प्रेशन यायेमाः धयादिसें भारतीय सञ्चार माध्यमतय्सं मनगढन्ते रुपं बियाच्वंगु समाचारयात कयाः सरकारं कुटनीतिक रुपं, कानुनी रुपं उपचार मालेगु जुइ धयादीगु खः ।
वय्कलं धयादीगु दु, ‘नेपाः व नेपाःया राष्ट्रियता, सार्वभौमिकता, नेपालीया स्वाभिमानया आँच वइकथंया समाचार सम्प्रेसन मयायेत इनाप याना, जिमिसं थुकिया विरुद्ध राजनीतिक व कानुनी रुपं उपचार मालेगु जुइ ।’

नेपालं कालापानिया लिम्पियाधुरा व लिपुलेकया दुथ्याकाः नेपाःया न्हूगु नक्सा पित पिथनेवं व प्रधानमन्त्री ओलीं थःत सत्तां चिइकेत भारत हे लगे जुयाच्वंगु धकाः धायेवं भारतीय सञ्चार माध्यमं नेपाः व प्रधानमन्त्री ओली विरुद्ध आपत्तीजनक रुपं थीथी सामग्री पित बियाच्वंगु दु । म्हिगः भारतया झारखण्डय् च्वंगु छगू टेलिभिजनं ला प्रधानमन्त्री ओली व नेपाःया निंतिं चिनियाँ राजदूत होउ यान्छि दथुइ प्रेम–सम्बन्ध दुगु धकाः तकं धयाहःगु खः ।

अथेहे भारतय् लोकंह्वःगु पत्रिका ‘टाइम्स अफ इन्डिया’य् प्रधानमन्त्री ओलीया ख्वाःपाः किपा छम्ह जनावरया किपाया ख्वालय् तयाः कम्युनिष्ट पार्टीया हे वाणं कयाच्वंगु स्केच तयाहःगु खः । थ्व स्केचयात कयाः पुलांम्ह परराष्ट्रमन्त्री लिसें राप्रपाया अध्यक्ष कमल थापां तकं छगू ट्विट यासें भारतीय सञ्चार माध्यमया आलोचना यानादीगु खः ।

पुलांम्ह परराष्ट्रमन्त्री थापां ट्विटय् धयातःगु दु, ‘प्रधानमन्त्री लिसे जिमिगु तःधंगु मतभेद दु, थुकी वय्कःया विदेश नीति नं दुथ्याः । तर प्रधानमन्त्री ओली विरुद्ध गुकथं भारतीय संचार माध्यम कुहां वल, उकियात स्वीकार यायेफइमखु । थुकिं नेपाः–भारत सम्बन्धय् छुं बांलाइमखु ।’

भारतीय सञ्चार माध्यमय् वयाच्वंगु समाचारयात कयाः नेकपाया प्रवक्ता नारायणकाजी श्रेष्ठ, नेपाल पत्रकार महासंघ, थीथी दलया नेतातय्सं नं विरोध यायेधुंकूगु दु ।

सम्बन्धित बुखँ

LEAVE YOUR COMMENTS