ने. सं. ११४४ ञलाथ्व नवमी -

नेवाः भूमिइ निषेधित क्षेत्र छाय् ?

येँ – नेवाःतय्गु आदिभूमि येँ देय्या थीथी लागाय् आवंलि जुलुस, धर्ना थेंज्याःगु प्रदर्शन याये दइ मखु धकाः सरकारं नकतिनि याःगु घोषणायात नेवाः राजनीतिक अभियान लगायत थीथी नेवाः संघ संस्थातय्सं विरोध याःगु दु ।नेवाः आदिभूमि स्वनिगलय् थथे निषेधित क्षेत्र घोषणा यानाः सरकारं अन्तर्राष्ट्रिय मानव अधिकारया मूल्य मान्यताया उल्लंघन याःगु दु धासें थ्व घोषणा तुरुन्त लित कायेत नं उमिसं माग याःगु दु ।

थ्व माग यासें म्हीग नेवाः राजनीतिक अभियान, उपत्यका सडक विस्तार पीडित संघर्ष समिति, वल्र्ड नेवाः अर्गनाइजेशन, शेभ नेपाः भ्याली, नेपाल सांस्कृतिक पुनर्जागरण अभियान, जन सरोकार समिति ख्वना, राष्ट्रिय युवा फोर्स व नेवाः ग्वाहालि पुचःपाखें गृहमन्त्री रामबहादुर थापायात नापलानाः छगू ज्ञापनपत्र समेत लःल्हाःगु दु ।

देशय् थीथी राज्यसत्तां याइगु अन्याय व दमन विरुद्ध स्वनिगःया नेवाः जनतां राणाकाल, पञ्चायतकालंनिसें आः तक नं विरोध प्रदर्शन याना हे वयाच्वंगु खँ न्ह्यथँसें ज्ञापनपत्रय् आः अथे प्रदर्शन यायेगु ज्यायात तकं प्रतिबन्ध तयेगुया अर्थ पुलांगु हे निरंकूश अलोकतान्त्रिक पलाः स्वयां नं पश्चगामी जूगु खँ उल्लेख यानातःगु दु ।

राज्यं नेवाःतय्गु म्वायेगु अधिकार समेत कुण्ठित जुइक थनया कला संस्कृति समेत नाश यायेगु कथं पलाः न्ह्याकाच्वंगु दु धासें थज्याःगु इलय् उकिया विरुद्ध सः तयेगु अधिकार समेत लाका कायेगु धइगु अभिव्यक्ति स्वतन्त्रताया समेत हनन खः धकाः नं उकी धयातःगु दु ।