धः व मंगाः सफा याइगु प्रविधि

यल (नेपालभाषा टाइम्स) – यल जिल्लाय् व मंगाः सफा याइगु जिटिङ, रोडिङ एन्ड ग्रयाबिङ प्रविधि दुत हःगु दु। यल महानगरपालिका वडा नं. ३य् उगु प्रविधि दुत हःगु खः ।

यल मनपा ३ नं. वडां थःत वइगु वार्षिक निगू करोडया बजेतमध्ये चालु आर्थिक दँया ७७ गू लाख बजेटं धः व मंगाः सफा यायेगु जिटिङ, रोडिङ एन्ड ग्रयाबिङ प्रविधि हःगु खः ।

वडाअध्यक्ष श्रीगोपाल महर्जनं थ्व प्रविधिपाखें २० फिट तक क्वय् च्वंगु फोहर नं याउँक लिकायेगु फइगु धासें स्वंगू किसिमया ज्या याइगु प्रविधिं लः सफा यायेगु, धः दुने मुनाच्वंगु बोरा, कापः, प्लाष्टिक लगायतया फोहर साला काइगु व मंगाः दुने च्वंगु सफा लःया प्रयोग यानाः मंगालय् च्वंगु फोहर सालेगु ज्या याइगु जानकारी बियादिल ।

१५५० लिटर क्षमताया लः ट्यांकी दुगु थ्व प्रविधि एभिडा कामधेनु नां कम्पनीं नेपालय् न्हापांखुसी हःगु नं वडाअध्यक्ष महर्जनं जानकारी बियादिल ।

इन्धन प्रयोग यानाः संचालन यायेमाःगु प्रविधिइ छम्ह चालक, निम्ह ग्वाहालिमि व प्रविधिं हरेक पटक लिकाइगु फोहर व्यवस्थापन सुनिश्चित जुइमाःगु वय्कलं धयादिल । ३ वडां थुगु प्रविधि दुत हःगु खःसां महानरया मेमेगु वडाय् नं थ्व प्रविधियात प्रयोग याकेगु व उकिया निंतिं सहलह यायेगु वय्कलं कनादिल ।