स्वनिगलय् छन्हुं ६७६ म्ह संक्रमित, देय्न्यंकं १ हजार ४५९ म्ह

येँ (नेपालभाषा टाइम्स) – नेपालय् म्हिगः छन्हुं १ हजार ४५९ म्ह मनूतय्के कोरोना भाइरस संक्रमण जूगु लुइकूगु दु। थ्व ल्याः नेपालय् आःतक छन्हु दकलय् अप्वः संक्रमण जूपिनि ल्याः खः । अथेहे स्वनिगलय् नं म्हिगः संक्रमण जूपिनि ल्याखय् कीर्तिमान कायम जूगु दु। म्हिगः छन्हुं हे स्वनिगलय् ६७६ म्हेसिके संक्रमण खनेदुगु खः । म्हिगः देय् न्यंकया प्रयोगशालाय् १० हजार ३७५ म्हेसिया परीक्षण याःगु खः । थुकी थ्यंमथ्यं झिगू प्रतिशतयात संक्रमण खनेदुगु खः । म्हिगः जक कोरोना संक्रमणं ११ म्हेसिया ज्यान वंगु खः ।

म्हिगः संक्रमण पुष्टि जूपिं मध्ये स्वनिगलय् हे बछिं मल्याक लाःगु दु। स्वनिगलय् जक ६७६ म्ह संक्रमण जूपिं लूगु खः । उकी मध्ये दकलय् अप्वः येँ ५५५, ख्वपय् ८६ व यलय् ३५ म्ह संक्रमण पुष्टि जूगु खः । थुकिया लिसें नेपालय् मंगलवाः तक संक्रमण जूपिनिगु ल्याः ५६ हजार ७८८ म्ह थ्यंगु दुसा सीपिनि ल्याः ३७१ म्ह थ्यंगु दु ।

स्वास्थ्य मन्त्रालयं धाःकथं संक्रमण जूपिं मध्ये ४० हजार ६३८ म्हेसित धाःसा संक्रमण मुक्त जुइधुंकूगु दु। म्हिगः न्हिछिया दुने जक १०६२ म्ह संक्रमण मुक्त जुयाः डिस्चार्ज जूगु खः । मन्त्रालयया प्रवक्ता डा. जागेश्वर गौतमया कथं देय्न्यंक आः १५ हजार ७७९ म्ह सक्रिय संक्रमित दु। उकि मध्ये ८१३९ म्ह संस्थागत आइसोलेसनय् च्वनाच्वंगु दुसा मेपिं छेँय् आइसोलेशनय् च्वनाच्वंगु दु ।

स्वास्थ्य मन्त्रालयया कथं आः वयाः संक्रमण जूपिं मिसापिनिगु ल्याः नं अप्वयाः वनाच्वंगु दु। म्हिगः देय्न्यंकं संक्रमण जूपिं मध्ये मिसापिं ४४६ व मिजंपि १०१३ म्ह जूगु खः । संक्रमित जूपिं अप्वः धयाथें २१ निसें ४० दँ दुपिं जूगु खँ नं मन्त्रालयं धाःगु दु ।

सम्बन्धित बुखँ

LEAVE YOUR COMMENTS