क्यानाडाया काराब्राम बहुसांस्कृतिक मेलाय् नेपालमण्डपयात न्हाप सिरपाः

येँ(नेपालभाषा टाइम्स)÷क्यानाडाया ब्राम्प्टनय् छुं दिं न्ह्यः जूगु ‘अन्तर्राष्ट्रिय काराब्राम बहुसांस्कृतिक मेला’य् नेपालमण्डपं उत्कृष्ट स्थान प्राप्त यायेत सफल जूगु दु । वंगु जुलाई ७ निसें ९ तारिख स्वन्हुयंकं जूगु मेलाय् नेपालमण्डपं ‘बेस्ट इन्टरटेन्मेन्ट’य् न्हापांगु थाय् कायेत सफल जूगु खः ।
अथे हे मेलाय् ‘सांस्कृतिक सजावट ब्वज्या’य् स्वंगूगु थाय् प्राप्त याःगु दु ।

उगु मेलाय् विश्वया थीथी देशं ब्वति काःगु खः । क्यानडालिसें नेपाः चीन, भारत, कोलम्बिया, आयरल्याण्ड, इटाली, पेरु, फिलिपिन्स,पोर्चुगल, युक्रेन, अफ्रिका, क्यारेबियनलिसें थीथी देय्या प्रान्तीय राज्यया पुचलं नं ब्वति काःगु खः मेलाय् थःथःगु देय्या प्रतिनिधित्व यासे थःथःगु जातीय म्हसीका पिज्वइगु कला, संस्कृति, तिसावसः, परम्परागत नसात्वँसा, प्याखं, म्येँ, संगीत न्ह्यब्वःगु खः ।

मेलाया औपचारिक समापनया घोषणा यायेगु ल्याखं ग्वसाः ग्वःगु ज्याझ्वलय् निर्णायक समितिं मेलाय् उत्कृष्टया घोषणालिसें सिरपाः नं लःल्हाःगु खः । समापन ज्याझ्वलय् काराब्राम मेला आयोजक समितिया अध्यक्ष एन्जेला जोन्सनं सकसिगुं ग्वाहालिं हे थुगु दँया मेला तसकं बांलाक, झःझः धायेक व प्रभावकारी रुपं सम्पन्न जूगु धासें मेला सफल यायेत ग्वाहालि यानादीपिं सकसितं सुभाय् देछानादिल ।

थुगुसी जूगु मेला क्यानेडियन नेवाः गुथि, एनसीसीएस व एनजेएसीया मंकाः ग्वसालय् जूगु खः । स्वन्हुयंकंया मेलाय् छन्हु छन्हु स्वंगुलिं संस्थाया नेतृत्वय् थीथी ज्याझ्वः न्ह्यब्वःगु खः । मेलाया उलेज्या क्यानाडाया निंतिं नेपाःया कार्यवाहक राजदूत रोजिना ताम्राकारं यानादीगु खःसा संघीय सांसद सोनिया सिन्धुलिसें विशिष्ट व्यक्तित्वपिंसं मेलाया अवलोकन यानादीगु खः ।

थ्व हे झ्वलय् मेलाया उद्देश्य व उपलब्धिया बारे जानकारी बीगु ल्याखं मेला आयोजना याःगु स्वंगुलिं संस्था क्यानेडियन नेवाः गुथि, एनसीसीएस व एनजेएसीं छगू मंकाः पत्रकार सम्मेलन नं याःगु दु । पत्रकार सम्मेलनय् ब्राम्प्टन नगरया मेयर प्याट्रिक ब्राउनं स्वंगुलिं संस्थां मंकाःकथं ज्याझ्वः ग्वसाः ग्वयाः मेला सफलतापूर्वक संचालन याःगुलिं लसता प्वंकादिसें याकनं हे नेपाः भ्रमण यायेगु इच्छा नं प्वंकादिल । वय्कलं नेपाः भ्रमण यानाः नेपाःया कला, संस्कृतिया प्रत्यक्ष रुपं अवलोकन व अनुभूति यायेगु थःगु इच्छा जूगु खँ कनादिल ।

पत्रकार सम्मेलनय् हे मेयर ब्राउनं मेला सफलतापूर्वक संचालन याःगु लसताय् स्वंगुलिं संस्थायात ब्राम्प्टन नगरपाखें भिंतुना पौ नं लःल्हानादीगु खः ।