थिमिया उपमेयरयात हातपात

येँ (नेपालभाषा टाइम्स)÷ विकास निर्माणया ज्याया अनुगमनय् वंम्ह मध्यपुर थिमि नगरपालिकाया उपमेयर विजयकृष्ण श्रेष्ठयात हातपात याःगु दु । नगरपालिकाया मध्यपुर थिमि नगरपालिका वडा नं. ५ य् च्वनीम्ह सुमन जोशी लगायतया पुचलं उपमेयरयात हातपात याःगु खँ नगरपालिकां धाःगु दु ।

नगरपालिका व नेकपा माओवादी केन्द्र मध्यपुर थिमि नगर कमिटीं म्हिगः बिस्कं बिस्कं विज्ञप्ति पिकासें घटनाया छानविन यानाः दोषीयात कारबाही यायेत माग नं याःगु दु । बालकुमारी हात्तमहाकाल सतक आयोजनाया योजना न्ह्याकेगु झ्वलय् निगू पुखू त्वालय् अप्पां सीगु ज्याया निंतिं वंगु माघय् नगर प्रमुख व उपप्रमुखया उपस्थितिइ बालकुमारी आत्तिमहाकाल सतक उपभोक्ता समिति नीस्वंगु खः ।

अप्पां सीगु ज्या न्ह्याकेगु नितिं सहजीकरण यायेत ज्या यानाच्वंगु थासय् उपप्रमुखयात हातपात याःगु व हातपात याःपिंत मालेगु ज्या जुयाच्वंगु खँ प्रहरीं धाःगु दु ।