मनसुन सक्रिय, खुसिबाः व चलखं सचेत जुइत इनाप

येँ (रासस) – छुं न्हि न्ह्यव निसें देय्या पूर्वी भूभागं दुहां वःगु मनसुन देय्न्यंकं सक्रिय जूगु दु। मौसम पूर्वानुमान महाशाखां मनसुन सक्रिय जुइवं आः छुं न्हि वा वइगु सम्भावना दुगु धासें खुसिबाः वइगु, चलः वइगु पाखें बचे जुया च्वनेत धाःगु दु ।

थुगुसी वंगु जेठ ३० गते नेपाःया पूर्वी भूभाग जुयाः मनसुन दुहां वःगु खः । महाशाखां आः छुं छुं थासय् तसकं वा वयेफुगुलिं खुसिया लः अप्वयाः खुसिबाः वइगु, चलः वनीगु लिसें सतक व हवाइ यातायात तकं प्रभावित जुइफुगु खँ धाःगु दु। मौसमविद् विभूति पोखरेलया कथं सुदूरपश्चिमया छुं छुं थासय् पश्चिमी वायुया प्रभाव व मेमेगु भूभागय् मनसुनी वायुया प्रभाव लानाच्वंगु दु ।