येँ महानगरया स्कूलय् नेपालभाषा

येँ (नेपालभाषा टाइम्स) – येँ महानगरपालिकां महानगरपालिका अन्तर्गतया स्कूलय् आः स्थानीय विषयया रुपय् नेपालभाषा ब्वंकीगु जूगु दु । विद्यालय शिक्षाय् नेपालभाषाया पाठ्यक्रम दयेकाः लागू यायेगु प्रस्ताव महानगरपालिकां न्ह्यःने हःगु खः । येँ महानगरपालिकाया आर्थिक वर्ष २०७७-७८ या नीति तथा कार्यक्रम प्रस्तुत यासें महानगर प्रमुख विद्यासुन्दर शाक्यं शिक्षा सम्बन्धी नीतिइ थ्व खँ प्रस्ताव यानादीगु खः ।

शिक्षा सम्बन्धी न्हूगु सरकारीनियमकथं आः स्थानीय निकायय् स्थानीय भाषा, लिपि, थाय्बाय्, सम्पदा, संस्कृति सम्बन्धी ज्ञान बीगु लागिं १०० पूर्णाङ्कया छगू स्थानीय विषय ब्वंकेमाः । उगु स्थानीय विषयया पाठ्यसामग्री नं स्थानीय सरकारतय्सं हे निर्माण याइ । येँ महानगरपालिकां उगु स्थानीय विषय नेपालभाषां हे ब्वंकेगु प्रस्ताव न्ह्यःने हःगु खः । प्रमुख शाक्यं पेश यानादीगु नीति तथा कार्यक्रमय् थ्व सम्बन्धी बुँदाय् धयातःगु दु, ‘विद्यालय शिक्षाय् नेपालभाषाया स्थानीय पाठ्यक्रम दयेकाः लागू यायेगु जाइ । थुकथं निर्माण जुइगु पाठ्यक्रमय् स्वनिगःया भाषा, रहनसहन, संस्कृति, सम्पदा लगायत नैतिक शिक्षायात समेत कःघानातःगु दइ ।’

सरकारं स्थानीय विषय धकाः छुटे यानातःगु उगु विषय थीथी स्कूलतय्सं थः यःयःथे ब्वंका वयाच्वंगु खः । छुं छुं स्थानीय सरकारतय्सं उगु पाठ्यक्रमया विषयवस्तु फुक्क स्थानीय जनजीवन बारे तःसां ब्वंकेगु माध्यम धाःसा खस नेपाली भाषा यानातःगु खः । आः येँ महानगरपालिकां धाःसा उगु विषय ब्वंकेगु माध्यम समेत नेपालभाषा हे यायेगु धकाः नीति तथा कार्यक्रमय् समावेश याःगु खः ।

नीति तथा कार्यक्रम पारित जुइवं येँ महानगरपालिका अन्तर्गत लाःगु निजी व सामुदायिक फुक्कं स्कूलय् थ्व छगू विषय नेपालभाषां ब्वंकेमाःगु जुइ । महानगर पालिकां थ्व स्थानीय विषयया पाठ्यक्रम नेवाः भासं तयार नं याना तयेधुंकूगु दु । आःयात थ्व विषय १ तगिंनिसें ८ तगिं तक ब्वंकेगु व्यवस्था जुइ ।