ने. सं. ११४४ कछलागा अष्टमी - भैरवाष्टमी

एकान्तकुमारी कुमारी द्यःछेँय् बिज्याकल 

ख्वप (रासस)- जीवित देवी कथं हनातःम्ह ख्वपया एकान्तकुमारी लुनिभाः वज्राचार्ययात आइतवाः सुथय् कुमारी छेँय् बिज्याकल । कुमारीयात द्यःछेँय् बिज्याके धुनेवं ख्वपय् कुमारी व तलेजुया जात्रा सुरु जुइ । कुमारीयात नलाःस्वने चःह्रे निसें कुमारीछेँय् बिज्याकाः कुमारी जात्रा हनेगु परम्परा कथं तान्त्रिक विधि कथं पुजा यानाः ख्वप नगरपालिकाया क्वाठण्डौंय् च्वंगु कुमारी छेँय् तयेहःगु खँ तलेजुया मू नाइके नरेन्द्रप्रसाद जोशीं कनादीगु दु । तलेजुइ चण्डी पाठ यानाः राजोपाध्याय व कर्माचार्यं कुमारीया पुजा यानाः कुमारी जात्रा याइगु खँ वय्कलं कनादिल । थ्व ई दुने टिबुक्छेँय् च्वंपिं झिंछम्ह गणकुमारीयात नं तलेजुइ हयाः पुजा याइ ।

कुमारीयात नलास्वने चःह्रे कुन्हु हे लाकुलिइ च्वंगु चतुब्रम्ह महाविहारय् यंकाः पुजा यानाः हाकनं कुमारी छेँय् यंकेधुनेवं चालं तक कुमारी पुज्यायेत सर्वसाधारण कुमारी छेँय् वइगु खँ मू नाइके जोशीं कनादीगु दु ।

चालं कुन्हु कुमारीया ल्हातय् तलेजुया पुजारी, मू नाइके लगायतयात साइत स्वयाः सिन्हः तिके धुनेवं सर्वसाधारणयात नं कुमारीया ल्हातं सिन्हः तिकी । थुकुन्हु हे कुमारीं थः बूगु छेँय् वनेगु इच्छा यातकि कुमारी छेँय् नं पितहयाः वसपोलया छेँय् यंकीगु परम्परा दु । कुमारी जात्राया झ्वलय् नेपाःया हे मू तलेजु कथं कयातःगु ख्वपया तलेजुइ वैदिक व तान्त्रिक पद्धति कथं पुजा यानाः ‘दसैघर’ य् नलाःस्वां तइ ।

जुजु हरिसिंह देव व देवलदेवीं नेपाल संवत् ४४४ य् सिम्रनगढं हःम्ह तलेजुयात ख्वपय् प्रतिस्थापन यायेधुंकाः तलेजु जात्रा हनेगु परम्परा सुरु जूगु खँ मू नाइके जोशीं कनादीगु दु । नलास्वने चःह्रे निसें दशमी तक मूगुथि, चौगुथि समुदायं श्रीद्धिमाजु देवीया नं पुज्यायेमाःगु परम्परा दु । अथेहे नलास्वने चःह्रेकुन्हु भण्डार पुखुलिइ नं विशेष पुजा यायेगु परम्परा दु ।

ख्वपया तलेजुइ सप्तमीनिसें दशमीतक तलेजु जात्रा हनी । थ्व झ्वलय् सप्तमि निसें महानवमी तकया दुने ५४ म्ह दुगु, ३२ म्ह मेय् व २४ म्ह हँय् बलि बियाः कालरात्री यानाः जात्रा हनीगु खँ तलेजुया मू नाइके जोशीं कनादिल । तलेजुया मू पुजारीं मांशाहुती होम यायेधुंकाः बलि बीगु सुरु याइ । सप्तमी कुन्हु तलेजुयात देवगृहपाखें स्थनान्तरण यानाः छेँय् विराजमान याकाः जात्रा न्यायेकीगु परम्परा दु ।