न्यायिक समितिया ज्या शुरु

येँ(नेपालभाषा टाइम्स)- येँ महानगर पालिकाया न्यायिक समितिं थःगु ज्या न्ह्याकूगु दु । महानगरया न्यायिक समितिं इजलासपाखें न्याय निरुपणया ज्या न्ह्याकूगु खः । महानगरय् वइगु थीथी मुद्दायात कयाः न्यायिक समितिइ सुुनुवाइ यायेगु जिम्मेवारी बियातःगु दु ।

न्यायिक समितियात दछिया कैद जुइ फइगु फौजदारी मुद्दा, मेलमिलाप जुइ मफुगु देवानी मु्द्दा, अप्वलय् २५ गू लख तकया बिगो बराबरया छेँ बाः व छेँ बाःया सुविधा दुगु मुद्दा स्वयेगु जिम्मेवारी बियातःगु दु ।

येँ महानगर उपप्रमुखलिसें न्यायिक समितिया संयोजक सुनिता डंगोलं वडाय् हे मेलमिलाप कक्ष दयेकाः विवादयात अन हे समाधानया निंतिं कुतः यायेगु व अन सहमति जुइ मफयाः महानगरय् वःगुयात फक्व याकनं निगुलिं पक्ष त्याइकथंया विधिपाखें समाधानया निंतिं कुतः यायेगु जुइ धयादीगु दु ।

महानगरया न्याय प्रशासक रामप्रसाद पौडेलं समितिइ वःगु उजुरीयात कयाः मेलमिलाप यायेगुयात हे न्हापां प्राथमिकता बिया वनेगु जुइ धासें निगुलिं पक्षया खँ न्यनेमाःगु, तथ्य व प्रमाण चूलाकेमाःगु नापं निगुलिं पक्षयात चित्त बुझे यायेमाःगु जूगुलिं गबलें गबलें उजुरी वा मुद्दा फस्र्यौट यायेत ई काइगु नं
वय्कलं धयादिल ।

नेपाःया संविधानया धारा २१७ य् न्यायिक समितिया व्यवस्था यानातःगु दु । समितिया कार्य व्यवस्था, कर्तव्य व क्षेत्राधिकार स्थानीय सरकार संचालन ऐन २०७४या परिच्छेद ८ य् व्यवस्था यानातःगु दु । समितिं स्थानीय सरकार संचालन ऐन २०७४या दफा ४७ कथं न्यायिक समितिया क्षेत्राधिकार, दफा ४८ कथं अधिकार क्षेत्रया प्रयोग, दफा ४९ कथं न्याय सम्पादनया प्रक्रियाय् च्वनाः न्याय सम्पादन याइ ।

न्यायिक समितिइ २४२ गू उजुरी लानाच्वंगु दु ।