अदालतया फैसलां चिन्तित जुइम्वाः
येँ (नेपालभाषा टाइम्स)- प्रधानमन्त्रीलिसें माओवादी केन्द्रया अध्यक्ष पुष्पकमल दाहाल प्रचण्डं द्वन्द्वकालीन घटनायात कयाः सर्वोच्च अदालतय् लाःगु मुद्दाय् शान्ति सम्झौताया पक्षय् हे आदेश वःगु खँ धयादीगु दु ।
म्हिगः माओवादी केन्द्रलिसे सतीगु शिक्षक संगठन एकीकृत अखिल नेपाल शिक्षक संगठनया खुक्वःगु राष्ट्रिय महाधिवेशनयात संबोधन यासें वय्कलं उगु खँ धयादीगु खः ।
सर्वोच्चया आदेश लिपा आः शान्ति प्रक्रिया न्ह्यःने यंकेत व निष्कर्षय् थ्यंकेत अःपुइगु धासें वय्कलं सर्वोच्चय् थः विरुद्ध लाःगु द्वन्द्वकालीन घटनाया मुद्दां पार्टी कार्यकर्तात चिन्तित जूगु धासें वय्कलं धयादिल, ‘विस्तृत शान्ति सम्झौता स्वयां पिने अध्यक्ष व प्रधानमन्त्रीयात छुं जुइगु खः ला धइगु चिन्ता जुयाच्वंगु खः तर जि बिल्कुल चिन्तित मजुया । छाय् चिन्तित मजुया धाःसां थ्व झीगु निंतिं सहयोगी जुल, थुकिं विभाजित माओवादीयात छगू हे थासय् वा धाःथें जुल, झीत छथाय् च्वँ धाःथें जुल ।’
प्रधानमन्त्री दाहालं संक्रमणकालीन न्यायया सिद्धान्तयात निष्कर्षय् थ्यंकेत सरकारं पलाः ल्ह्वने धुंकूगु व सर्वोच्च अदालतं नं उकियात तिबः बीकथं आदेश बिउगु धासें वय्कलं धयादिल, ‘अदालतया फैसला झीगु विस्तृत शान्ति सम्झौता स्वयां पिहां वंगु मदु, उकिया पक्षय् दु, चिन्तित जुइमाःगु मदु, तर सतर्क धाःसा जुइमाः ।’
सर्वोच्चय् लाःगु थ्व मुद्दाया कारणं माओवादी धारया गुंगू पार्टी छथाय् च्वं वःगु दुसा उमिसं मंकाः रुपं हे वक्तव्य जारी यासें संविधानय् च्वयातःगु स्वयां पिहां वनाः द्वन्द्वकालीन घटनाया फैसला मयायेत इनाप यायेधुंकूगु दु ।
थ्वहे झ्वलय् नेकपा माओवादीलिसे सतीगु नेवाः मुक्ति मोर्चां बलिदानलिसे परिवर्तित उपलब्धियात संस्थागत यायेत व देशय् थातं शान्ति स्थापनाया निंतिं पहल यायेत दक्वं पक्षयात अपील याःगु दु । मोर्चाया अध्यक्ष दिलिप महर्जन व महासचिव देवेन्द्र श्रेष्ठं मंकाः विज्ञप्ति जारी यासें उगु खँ धाःगु खः ।
प्रधानमन्त्री लिसें माओवादी केन्द्रया अध्यक्ष दाहाल विरुद्ध सर्वोच्चय् लाःगु द्वन्द्वकालीन घटनाया मुद्दायात कयाः विरोध यासें मोर्चां थज्याःगु गतिविधिं शान्ति प्रक्रियाय् लिच्वः लाकीगु खँ धाःगु दु । द्वन्द्वकालीन घटना सत्य निरुपण तथा मेलमिलाप आयोगया अधिकार दुने लाःगु धासें उकियात प्रतिकूल लिच्वः लाइगु गतिविधि मयायेत नं विज्ञप्तिइ इनाप यानातःगु दु ।
विस्तृत शान्ति सम्झौता पक्षधर, मिसा, उत्पीडित जाति, वर्ग, समुदाय, अग्रगामी राजनीतिक पार्टी, बुद्धिजीवी, मानवअधिकारकर्मी, पत्रकार लगायत सकलयात थातं शान्ति स्थापनाया निंतिं भूमिका म्हितेत अपील यासें मोर्चां प्रतिगमनकारी ज्याखँया प्रतिरोध यायेगु खँ नं धाःगु दु ।
LEAVE YOUR COMMENTS