फिमेल सुपरस्टार श्रीदेवी

बलिउड स्टार श्रीदेवी मंत धइगु आपाेसिनं पत्या याये मफुगु खँ जुल, तर थ्व सत्य खः । प्यदँ दुबलय् हे फिल्म यात्रा न्ह्याकूम्ह श्रीदेवीं थःगु अभिनय यात्राया न्यय्दँ पूवंके धुंकूगु दु । थःगु न्यय्प्यदँया जीवनय् वं ३०० गू फिल्म म्हितल । उकी मध्ये वयागु स्वसःगूगुु फिल्म “मम” थगुने तिनि पिहां वःगु खः । थ्व फिल्मय् वयागु अभिनययात कयाः आपाःसिनं तारीफ हे यात । ताः ई लिपा म्हितूगु फिल्मं वःगु तारीफ न्यने खनाः लय्तायाच्वंम्ह श्रीदेवी हाकनं मेगु फिल्म म्हितेगु तयारी यानाच्वंम्ह खः । तर वसिबें न्हापा हे कालं वयात सालायंकल ।

बाल कलाकारया रुपय् श्रीदेवी
श्रीदेवीया जन्म सन् १९६३ या अगस्ट १३ तारीख कुन्हु दक्षिण भारतया तामिलनाडुया शिवकासी धाःथासय् जूगु खः । वया अबुया नां अयप्पन खःसा मांया नां राजेश्वरी खः । थः प्यदँ तिनि दुबलय् फिल्म म्हितेगु शुरु याःम्ह श्रीदेवीं म्हितूगु न्हापांगु फिल्म तेलुगु भाय्या “थुनइभन” खः । थुकथं मचाबलय् बाल कलाकार जुयाः अभिनय यात्रा न्ह्याकूम्ह श्रीदेवीं तेलुगु, मलयालम व तामिल थेंज्याःगु दक्षिण भारतया फिल्मया नापनापं हिन्दी फिल्म नं मचांनिसें हे म्हितेगु शुरु याःगु खः । बाल कलाकारया रुपय् वं म्हितूगु दकलय् न्हापांगु हिन्दी फिल्म कथं “जूली” या चर्चा जुयाच्वंगु दु । थ्व फिल्मय् दक्षिण भारतया लक्ष्मी नांयाम्ह हिरोइनं मेन रोल म्हितूगु खःसा श्रीदेवीं वया केहँे जुयाः म्हितातःगु दु ।

हिरोइनया रुपय् न्ह्याकूगु पलाः
झिंस्वदँया उमेरय् हे ल्यासे जुया वयेधुंकूम्ह श्रीदेवीं हिरोइन हे जुयाः म्हितूगु दकलय् न्हापांगु फिल्म तामिल भाय्या “मुनरुदु मुनिचु” खः । थ्व सन् १९७६ या खँ खः । व धुंकाः लगातार दक्षिण भारतया फिल्म म्हितल । अनं लिपा वनाः तिनि हिन्दी फिल्म म्हितूगु खः । श्रीदेवीं म्हितूगु न्हापांगु हिन्दी फिल्म “सोलवाँ सावन” खः । सन् १९७९ पाखे पिदंगु थ्व फिल्मया हिरो उगु इलय् आर्ट फिल्मया निंतिं नांजाःम्ह हिरो अमोल पालेकर खः । छगू बिस्कं कथंया बाखं दुगु थ्व फिल्मं स्वकुमिया नुगः धाःसा त्याके मफुत । अले श्रीदेवीया हिन्दी फिल्म यात्रा छुं ईया निंतिं दिपा काल । अनं लिपा श्रीदेवी हाकनं दक्षिण भारतया हे फिल्मया संसारय् लिहां वनाछ्वत । अन वं उगु ईया लोकंह्वाःपिं दक्व धइथें हिरोत लिसे फिल्म म्हितूगु दु । विशेष यानाः कमल हासन व रजनीकान्तलिसे वयागु जोडियात हिट जोडी धकाः धाइ । कमल हसनलिसे ला नीन्हय्गू फिल्म नापं म्हितूगु दुसा व्यंकटेश, नागार्जुन थेंज्याःपिं हिरोतय् नापनापं एन टी रामाराव नांयाम्ह सिनियर हिरोलिसे तकं फिल्म म्हितल ।

 

बलिउडय् रि ईन्ट्रि
वयात बलिउडय् रि ईन्ट्रि याकूगु फिल्म “हिम्मतवाला” खः । १९८३ सालय् रिलिज जूगु थ्व फिल्मय् वया हिरो जितेन्द्र खः । नीदँ तिनि दुम्ह श्रीदेवीं बलिउडय् बाज्यःवंम्ह जितेन्द्रलिसे फिल्म म्हितल धकाः नं कुंखिउँपिं नं आपालं पिहां वल । तर स्वकुमिया दथुइ उमिगु जोडी लोकंह्वात । साउथय् कमल हासनलिसे थें हे तुं बलिउडय् जितेन्द्रलिसे वयागु फिल्मया ल्याः नं अप्वयावल । उमिसं तोहफा, मवाली, जस्टिस चौधरी, जानी दोस्त, बलिदान, घर संसार, औलाद, हिम्मत और मेहनत, आग और शोला, सरफरोश व मेमेगु आपालं फिल्म नापं म्हितल ।
बलिउडय् श्रीदेवी इन्ट्रि जूगु इलय् अनिल कपुर, ज्याकी श्राफ, सनी देवल, ऋषि कपुर, सन्जय दत्त, गोविन्दा थेंज्याःपिं ल्याय्म्ह पुस्ताया हिरोत लोकंह्वाना वयाच्वंगु खः । अय्सां श्रीदेवीया जोडि धाःसा जितेन्द्र, राजेश खन्ना, अमिताभ बच्चन थेंज्याःपिं सिनियर हिरोतलिसे जमे जुयाच्वंगुलिं आपासिनं वयात बाज्यःवंपिं हिरोतलिसे जक फिल्म म्हितीम्ह हिरोइन धकाः तकं धायेगु यात । राजेश खन्नालिसे वयागु मास्टरजी, मकसद, नयाँ कदम व नजराना थेंज्याःगु फिल्म पिदनसा अमिताभ बच्चनलिसे इन्कलाब, आखरी रास्ता व खुदा गवाह पिदन ।

नेपालय् श्रीदेवी
श्रीदेवी नेपालय् वःगु धइगु “खुदा गवाह” या शुटिङ्गया निंतिं खः । थुकिया शुटिंग न्हापा अफगानिस्तानय् जूगु खःसा थुकी न्हापा संजय दत्त नं दुगु खः । तर लिपा अफगानिस्तानया स्थिति स्यंबलय् नेपालया जोमसोमय् शुुटिङ्ग याःवःगु खः । थ्व ई तकया दुने संजय दत्त थीथी विवादय् लानाः जेलय् लाये धुंकूगु खः । उकिंं यानाः वयागु थासय् नागार्जुनयात हिरो यानाः फिल्म दयेकूगु खः । थ्व ई श्रीदेवी साप हे लोकंह्वानाच्वंगु ई खःसा वयागु “डेट” या लबः कायेगु निंतिं निर्माता निर्देशक यश चोपडां “लम्हे” फिल्मया छपु म्येँया शुटिङ्ग पोखराय् याःवःगु खः । “खुदा गवाह” फिल्मय् चूमलाःगु संजय दत्तलिसेया जोडी “गुमराह” नांयागु छगू फिल्मय् जूसां चूलाःगु दु ।

अनिल कपुरलिसेया हिट जोडी
बलिउडय् श्रीदेवी व अनिल कपुरया जोडी नं तसकं हे लोकंह्वाःगु जोडी खः । “मि. इण्डिया” नांयागु फिल्मं शुरु जूगु थ्व जोडीं लिपा वनाः लाडला, मि. बेचारा, लम्हे, जुदाई, जोशीले, रामअवतार तक लगातार फिल्म म्हितल । “मि. इण्डिया” फिल्मया निर्माता बोनी कपुर खः । उलि जक मखसे बोनी कपुर धइम्ह श्रीदेवीया बलिउड बिजनेश स्वइम्ह मेनेजर नं खः । थुकथं उमि दथुया स्वापू न्हापांनिसें दयावयाच्वंगु खः ।

न्ह्याम्हलिसे नं फिट व हिट
श्रीदेवी छम्ह अज्याःम्ह हिरोइन खः गुम्ह हिरोइन न्ह्याम्ह हिरोलिसे नं फिट व हिट जू । ऋषि कपुर लिसेया वयागु जोडी नं हिट जोडी हे खः । उमिसं म्हितूगु “चाँदनी” ला छगू ज्वःमदुगु दसु हे खःसा “नगीना”, “गुरु देव”, “कौन सच्चा कौन झूठा” फिल्मय् नं उमिसं नापं म्हितूगु दु । सनी देवललिसे श्रीदेवीया “चालबाज” छगू सुपर हिट फिल्म खःसा “नगीना”या सिक्वेल “निगाहें” नं वयागु सनी देवल लिसेया हिट फिल्म खः । श्रीदेवीं सनी देवललिसे जक मखसे वया अबु धर्मेन्द्रलिसे नं “नाकाबन्दी” नांयागु फिल्मय् हिरोइन जुया म्हितूगु दुसा “चाँदनी” फिल्मय् विनोद खन्नाया हिरोइन जुयाः म्हितूम्ह श्रीदेवीं लिपा वनाः “मम” फिल्मय् अक्षय खन्नालिसे तकं म्हितूगु दु । श्रीदेवीं शत्रुघन सिन्हालिसे “शेरनी”, ज्याकी श्राफलिसे “कर्मा” फिल्म नं म्हितल ।

खान कनेक्शन
बलिउडय् खान हिरोत धाल कि दकलय्–सकलय् बय्बय् यानातःपिं हिरोत खः । खय्त ला श्रीदेवीया इलय् खान हिरोतय्गु उदय मजूनि । तर लिपा वनाः खान हिरोतय् उदयया नापनापं श्रीदेवीं नं उपिंलिसे फिल्म म्हिताहल । उकी मध्ये सलमान खानलिसे चाँदका टुकडा व चन्द्रमुखी नांयागु निगू फिल्म म्हितूगु दुसा शाहरूख खानलिसे “आर्मी” पिदन । आमिर खानलिसे धाःसा वयागु फिल्म पिदंगु मदु । थुकथं आपालं हिरोतलिसे फिल्म म्हितूम्ह श्रीदेवीं लिपांगु पुस्ताया हिरो अक्षय कुमारलिसे “मेरी बीबीका जवाब नहीं” म्हितूगु दुसा छगू इलय् नम्बर वन हिरो धकाः बय्बय् यानातःम्ह गोविन्दालिसे नं “गैर कानूनी” नांयागु छगू फिल्म म्हितूगु दु ।

मतिना व इहिपा
श्रीदेवी व मिथुन चक्रवर्ति दथुया मतिना छगू इलय् बलिउडय् साप हे बय्बय् जूगु मतिनाया बाखं खः । कलाकार राकेश रोशनं निर्माण याःगु “जाग उठा इन्सान” नांयागु फिल्मय् म्हितुसांनिसें यःत्यःया क्यबय् मतिनाया स्वां ह्वयेकूपिं श्रीदेवी व मिथुनं लिपा गुरु, वक्त की आवाज व वतन के रखवाले नांयागु फिल्मय् नं नापं म्हितूगु खः । इमि थथे यःत्यः जुयाच्वंगु इलय् मिथुन चक्रवर्तिं थः न्हापांम्ह तिरीमय्जु हेलेना ल्यूकयात डिभोर्स बियाः योगिता बालीलिसे तिपू जीवन हनाच्वंगु खः । थः मिजं मेम्ह मिसालिसे लिना जूगु खँ पिहां वःबलय् योगिता बालीं आत्महत्या तकं यायेगु कुतः यात । थथे जूबलय् मिथुन चक्रवर्तिं श्रीदेवीयात कलाः नालाः छेँय् दुत यंकेगु आँट याये मफुत । थुकथं मिथुनलिसे ब्रेकअप जूगु इलय् श्रीदेवीयात साथ व तिबः बिउम्ह बोनी कपुरलिसे हे श्रीदेवीया इहिपा नं जुल । बोनी व श्रीदेवीया इहिपा जूगु इलय् बोनीया अर्जुन कपुर नांयाम्ह काय् नं दयेधुंकूगु खः । उलिजक मखसे श्रीदेवीं बोनी कपुरयात दाजु नालातःगु खः । तर उमि दथुया मतिनाया लिच्वः कथं श्रीदेवीया प्वाथय् दुबलय् तिनि इमिसं इहिपा याःगु खः । थः मांया लिथु जूवःगु कारणं यानाः अर्जुन कपुरं श्रीदेवीयात लिपातक बांलाक न्व हे मतू ।

त्वःफिके मजिउगु छुं खँ
श्रीदेवी व जया प्रदायात बलिउडय् दकलय् हिट हिरोइन जोडी धकाः धाइ । उमिसं मवाली, औलाद, नयाँ कदम, मकसद, तोहफा थेंज्याःगु आपालं फिल्मय् नापं म्हितूगु दु । थथे तःगू फिल्मय् नापं म्हितूसां इमि दथुइ धाःसा नतुसुतु मब्याः धइगु खँ छगू इलय् चर्चाया विषय जूगु खः ।
दक्षिण भारतं वःम्ह जूगुलिं वयागु हिन्दी उलि बांलाः मजू । उकिं वयागु निंतिं नाज नांयाम्ह कलाकारं डबिंग यानाबीगु खः । “आखरी रास्ता” नांयागु छगू फिल्मय् ला वयागु निंतिं नांजाःम्ह हिरोइन रेखां तकं डबिंग यानाबिउगु दु ।

थःगु शरीरया थीथी अंग बांलाकेत कस्मेटिक सर्जरी याना वयाच्वंम्ह श्रीदेवीं २९ क्वःतक थज्याःगु सर्जरी याकेधुंकूगु दुसा अज्याःगु मध्ये क्यालिफोर्नियाय् याःगु म्हुतुसीया सर्जरी फेल जूगु खः । धाइपिंसं ला थनतक धया हःगु दु की श्रीदेवीयात थज्याःगु कस्मेटीक सर्जरीं दुनेंदुनें कमजोर याना बिउगुलिं आकाझाकां थुलि बांमलाःगु घटना जूगु खः ।

जीवनया लिपांगु ई
जीवनया लिपांगु इलय् श्रीदेवी हाकनं फिल्मय् लिहां वयेगु मति तयाच्वंम्ह खः । खालि थः म्ह्याय् जान्ह्वी कपुरया डेब्यु फिल्म “धडक” या लिच्वः पियाच्वंम्ह खः । विशेष यानाः
“मि . इण्डिया” या सिक्वेलसां रिमेकसां दयेकेगु ग्वसाः ग्वयाच्वंगु खःसा आः उगु ग्वसाः धाःसा पूमवनीगु जूगु दु ।

सम्बन्धित बुखँ

LEAVE YOUR COMMENTS