बंगलादेशीतय्त नेपाः हयाः बन्धक

येँ (नेपालभाषा टाइम्स)- बंगलादेशी नागरिकतय्त वैदेशिक रोजगारीया नितिं थीथी देशय् छ्वया बी धकाः येँय् हयाः बन्धक दयेकूपिं न्हय्म्हेसित प्रहरीं ज्वंगु दु ।

येँय् बन्धक दयेकाः तयातःपिं थ्व बंगलादेशी नागरिकया छेँय् फोन यानाः फिरौटी समेत माग याःगु द्वपनय् नेपाःया प्रहरीं उमित ज्वंगु खः । लिसें बन्धक दयेकातःपिं खुम्हेसित नं प्रहरीं उद्धार याःगु दु । थ्व गिरोहं बंगलादेशी नागरिकतय्त येँया थीथी होटल व सेफ हाउसय् बन्धक दयेकाः तयातःगु खः । नेपाःया प्रहरीं बन्धक दयेकेगु ज्या याःपिं अमिर हुसेन, एमडी मोसिउर, सलिम मियां, जहांगीर आलम, तहमिना बेगम नांया बंगलादेशी व नेपाःया रोशनी राई व तारा नेपालीयात ज्वंगु खः ।

प्रहरीं कालिमाटीय बन्धक दयेकाः कुनातःपिं एमडी नाजमुल, एमडी इयासिन, इब्राहिम हुसेन व एमडी अल अमिनयात उद्धार याःगु खः । उकथं हे जलय् बन्धक दयेकातःपिं राजोन व फरहाद हुसैनयात नं उद्धार याःगु खः ।