येँ महानगरपालिकाय् दकलय् अप्वः बेरुजु
येँ(नेपालभाषा टाइम्स)- महालेखा परीक्षकया ज्याकूया लिपांगु छगू प्रतिवेदनकथं स्वनिगः दुने स्थानीय तह मध्ये दकलय् अप्वः बेरुजु येँ महानगरपालिकाय् दुगु खनेदुगुु दु । महालेखाया प्रतिवेदनकथं आर्थिक दँ ०७९÷८० लय् जक येँ महानगरपालिकाया बेरुजु २५,७०,३३,५४५.५३ (नीन्यागू करोड न्हय्गू लख स्वीस्वद्वः न्यासः व पीन्यातका व न्यय्स्वंगः) ध्यबा दु ।
महानगरपालिकाय् थुकथं बेरुजु अप्वःगुया थीथी कारण नं प्रतिवेदनय् न्ह्यथनातःगु दु महालेखा परीक्षकया ज्याकूया प्रतिवेदनकथं कर्मचारीया खर्चय् अनियमितता, छक्वलं यक्व पेश्की काइगु व इलय् उकिया फछ्र्यौट मयाइगु, प्रक्रिया पूमवंकुसे खर्च यायेगु, लेखा परीक्षणप्रति उत्तरदायी मजूगु, लेखाया उत्तरदायी अधिकृत व जिम्मेवार कर्मचारीत हे आर्थिक कार्यविधि ऐन, २०५५, आर्थिक कार्यविधि नियमावली, २०६४ अःखः जुयाच्वंगु दु ।
अथे हे लेखा परीक्षण मयाकेगु, लेखाया उत्तरदायी अधिृकतं यायेमाःगु नियमित अनुगमन व निरीक्षण मयाःगु नापं प्रचलित आर्थिक ऐन, नियम, प्रशासनिक निर्णयतकं अस्पष्ट जूगुलिं बेरुजु अप्वःगु खँ न्ह्यथनातःगु दु । थुकथं हे बेरुजु म्हो यायेगु खँय् ध्यान मबिउगु, प्राथमिकताया निंतिं कुतः मयाःगु, महालेखा परीक्षक ज्याकुथिं क्वःछिनातःगु न्यूनतम ढाँचायात नं पालना मयाःगु, जनताप्रति गैरजिम्मेवार जूगु नं प्रतिवेदनय् धयातःगु दु ।
येँ महानगरलिपा निगूगु थासय् दकलय् अप्वः बेरुजु दुगु येँया मेगु स्थानीय तह गोकर्णेश्वर नगरपालिका खः । गोकर्णेश्वरया १२,२५,२९,११९.२९ तका बेरुजु दु । थुकथं हे भुइजःसि (बुढानीलकण्ठ) नगरपालिकाया ७,१८,०६,३९४.२१, कागेश्वरी मनोहरा नगरपालिकाया ६,३१,८६,६३७, दक्षिणकाली नगरपालिकाया ६,२१,२३,४६६, चन्द्रागिरि नगरपालिकाया ५,०३,६०,८४६ बेरुजु दु । तोखा, किपू, तारकेश्वर, शंखरापुर (सक्व) व नागार्जुन नगरपालिकाया न्यागू करोड स्वयां म्हो बेरुजु दुगु महालेखाया प्रतिवेदनय् धयातःगु दु ।
LEAVE YOUR COMMENTS