‘विकासया नामय् संरचना थुने मजिउ’

येँ (नेपालभाषा टाइम्स)- संस्कृति, पर्यटन तथा नागरिक उड्डयन मन्त्री जीवनराम श्रेष्ठं येँ थेंज्याःगु सांस्कृतिक शहरया विकासया नामय् संरचना थुनेगु ज्या याये मजिउगु खँ धयादीगु दु । म्हिगः विश्वेश्वर महादेव देगः पुनर्निर्माण ज्या न्ह्याकेगु व ‘हनुमानढोका’ नांया सफू विमोचन समारोहयात सम्बोधन यासें मन्त्री श्रेष्ठं उगु खँ धयादीगु खः ।

वय्कलं स्वनिगः पर्यटकीय दृष्टिकोणं अत्यधिक महत्वपूर्णगु थाय् खः धासें लँ तब्या यायेगु नामय् छेँ थुनेगु ज्या याये मजिउगु खँ नं धयादीगु खः । दकलय् न्हापा भौतिक संरचना संरक्षण यायेफुसा जक सम्पदाया महत्व दइ धासें वय्कलं स्वनिगःयात पर्यटकीय नगरी दयेकेमाःगु खँ धयादीगु खः ।

मन्त्री श्रेष्ठं पर्यटन क्षेत्रयात क्वातुकेगु नितिं मन्त्रालयं पर्यटन दशक घोषणा यानागु व आः छसिकथं देशया पर्यटन विकासया ज्या मन्त्रालयं न्ह्याकेगु प्रतिवद्धता नं प्वंकादिल । वय्कलं पर्यटनं हे देशय् रोजगारी व आर्थिक आर्जन जुइ धासें पर्यटन क्षेत्रयात थप व्यवस्थित यायेमाःगु खँय् नं बः बियादीगु दु ।