येँ -एमालेया वरिष्ठ नेता माधव नेपालं प्रधानमन्त्री केपी ओलीलिसे वार्ता यायेत अस्वीकार यानादीगु दु । म्हिगः भाजु नेपालयात नापलायेगु लागिं एमालेया उपमहासचिव बिष्णु पौडेल नेपालया छेँ कोटेश्वर झाःगु खः । उगु इलय् उपमहासचिव पौडेलं नेता नेपालयात समस्या समाधान यायेगु लागिं प्रम ओली नापलानाः खँल्हाबल्हा यायेत इनाप यानादीगु खः । तर नेता नेपालं ओलीयात नापलायेत अनिच्छा क्यनादीगु खः ।
नेपाल नापलायेत बिष्णु पौडेल लिसें सुवास नेम्बाङ व शंकर पोखरेलपिं नं झाःगु खः । वय्कःपिंसं नेता नेपालयात पार्टीइ समाधान याये मफइगु छुं मुद्दा मदु, छिकपिं नापं च्वनादी माल धकाः इनाप यानादीगु खः ।
तर नेता नेपालं उकी खास हे रुची धाःसा क्यना मदी । वय्कलं स्वये, छलफल यानाः वये धकाः लिसः बियादीगु खः । तर थीथी खँ तःसां ओलीयात नापलायेगु खँ धाःसा तयामदीगु खँ धाःगु दु ।
प्रम ओलीं कांग्रेस सभापति देउवायात प्रधानमन्त्री दयेकेगु लागिं याःगु हस्ताक्षर लित कायेमाः धकाः सोमवाः तकया अल्टिमेटम बियादीगु खः । यदि सोमवाः तकया दुने थ्व हस्ताक्षर लित मकाल धाःसा एमाले एकताया सम्भावना दइ मखुत धकाः ख्याच्वः बियादीगु खः । म्हिगः सोमवाः उगु अल्टिमेटम क्वचाये स्वयां न्ह्यः नेपालयात माने यायेगु लागिं पौडेलपिं कोटेश्वर वंगु खः ।
नेपाल पक्षं धाःसा थःपिंसं प्रतिनिधिसभा बचे यायेगु लागिं हस्ताक्षर यानागु जूगुलिं लित कायेगु खँ जुइ मखु धकाः अस्वीकार यानादीगु खः । नेपाल पक्षं हस्ताक्षर लित मकाल धाःसा ओलीं छु पलाः ल्ह्वनादी धइगु खँ धाःसा स्पष्ट मजूनि ।
LEAVE YOUR COMMENTS