नेपालभाषा ब्वनेज्याया समस्या बारे सहलह

येँ – येँ महानगरपालिकां नेपालभाषाया माध्यमं ब्वंकाच्वंगु स्थानीय विषय कार्यान्वयनया विद्यमान अवस्था व उकिया चुनौतीया कयाः गहन सहलह यायेगु ज्या जूगु दु । येँ मनपा शिक्षा विभागं निन्हुयंकं छगू गोष्ठी यासें थुकिया बारे सहलह याःगु खः ।

गोष्ठीइ न्ववासें येँ मनपाया मेयर विद्यासुन्दर शाक्यं स्थानीय सरकारं स्थानीय भाषाया संरक्षण यायेमाः धकाः संविधानय् हे च्वयातःगु जुयाः थःपिंसं संविधानया पालना यायेत नेपालभाषाया माध्यमं स्थानीय विषय ब्वंकागु खँ कनादिल । उपमेयर हरिप्रभा खड्गी श्रेष्ठं येँ मनपां नेपालभाषा ब्वंकेगु शुरु यायेवं उकिया लिच्वः छेँय् छेँय् हे लानाच्वंगु दु धयादिल ।

अथे हे कामपा सहरी योजना आयोगया उपाध्यक्ष सरोज बस्नेतं येँ मनपां याःगु आपालं बांलाःगु ज्या मध्ये दकलय् महत्वपूर्ण ज्या नेपालभाषाया माध्यमं ब्वनेज्या खः धयादिल । शिक्षा विभागया प्रमुख रामप्रसाद सुवेदीं मनपां याःगु थ्व निर्णयप्रति येँया जनतां गर्व महसुस यानाच्वंगु दु धयादिल ।

विभागया अधिकारी मोतिराज खनालं लसकुस यासें न्ह्याःगु उगु ज्याझ्वलय् नेपालभाषां ब्वंकेज्याय् वयाच्वंगु चुनौती, समाधानया उपाय व आः याना वनेमाःगु ज्याखँ बारे पुचः पुचः सहलह यानाः निष्कर्ष पिकायेगु ज्या जूगु खः । गोष्ठीइ नेपालभाषा कार्यान्वयय् सहभागीपिंसं ब्वति कयादीगु खः ।

सम्बन्धित बुखँ

LEAVE YOUR COMMENTS