शंखधर दिवसया तयारी
येँ(नेपालभाषा टाइम्स)÷वइगु कछलाथ्व दशमिकुन्हु शंखधर दिवस न्यायेकेगु निंतिं तयारी न्ह्याःगु दु । नेपाल संवत् न्हूदँ राष्ट्रिय समारोह समिति ११४३या ग्वसालय् शंखधर दिवस न्यायेकेगु तयारी याःगु खः ।
नेपाल सरकारं नेपाल संवत्या प्रवर्तक शंखधर साख्वाःयात राष्ट्रिय विभूति घोषणा याःगु दिं दँय्दसं कछलाथ्व दशमिकुन्हु शंखधर दिवस न्यायेकेगु याना वयाच्वंगु दु ।
थुगुसी छन्हुं हे प्यथाय् शंखधर दिवस हनेकथं तयारी जुयाच्वंगु दु । थ्व कुन्हु लखुतीर्थ, असं, थँहिति व शंखधर उद्यानय् थीथी ज्याझ्वः यानाः शंखधर दिवस हनेगु तयारी जुयाच्वंगु समारोह समितिं जानकारी बिउगु दु । कछलाथ्व दशमिकुन्हु सुथय् ७ ताः इलय् लखुतीर्थय् समारोह समितिया हे ग्वसालय् छगू ज्याझ्वः याइगु जूगु दुसा उकुन्हु हे सनिलया ४ ताः इलय् शंखधर पार्कस्थित शंखधर उद्यानय् दीपावली यायेगु ज्याझ्वः तयातःगु दु ।
अथे हे असनय् असन सेवा समितिया ग्वसालय् सुथसिया १० ताः इलय् असनय् व ११ ताः इलय् थँहिति मानन्धर गुथिया ग्वसालय् थँहिति त्वालय् नं शंखधर दिवसया लसताय् ज्या जुइगु जूगु दु ।
नेपाल संवत्या प्रवर्तक शंखधर साख्वाःयात नेपाल संवत् ११२० कछलाथ्व दशमिकुन्हु तात्कालीन प्रधानमन्त्री कृष्णप्रसाद भट्टराईं राष्ट्रिय विभूतिया घोषणा यानादीगु खःसा नेपाल संवत् ११२९ य्् पुष्पकमल दाहाल नेतृत्वया सरकारं नेपाल संवत्यात राष्ट्रिय संवत्या मान्यता बियादीगु खः ।
शंखधर साख्वाःयात राष्ट्रिय विभूतिया घोषणा याःगु दिंया लसताय् थ्वकुन्हु मध्यपुर थिमिया शंखधर चोकय् नं दीपावली यायेगु ज्याझ्वः तयातःगु दु ।
LEAVE YOUR COMMENTS