ने. सं. ११४४ ञलाथ्व नवमी -

लुम्बिनीइ वायु प्रदूषण अप्वयेकीगु उद्योग अझं चालु

येँ – सरकारं लुम्बिनी मायादेवी देगः परिसर जःखः कार्बन उत्सर्जन याइगु उद्योग चायेकेत प्रतिबन्ध तयातःसां उगु निर्णय धाःसा कार्यान्वयन जुइ फयाच्वंगु मदु । औद्योगिक प्रवद्र्धन बोर्डं झिदँ न्ह्यः हे लुम्बिनीया १५ किलोमिटर जःखः अज्याःगु उद्योग चायेकेत प्रतिबन्ध तःगु खः । तर प्रतिबन्ध तयातःगु थासय् हे उद्योग विभागं श्रीराम सिमेन्ट उद्योग चायेकेत अनुमति बिउगु दु ।श्रीराम सिमेन्ट उद्योगं आः प्रतिबन्धित लागा सियारी गाउँपालिका दुने उद्योग चायेकेत भौतिक निर्माण न्ह्याकूगु दु । थुकियात कयाः स्थानीय जनतां विरोध यायेवं निर्माण ज्या तत्काल दिकूगु दु । अख्तियार दुरुपयोग अनुसन्धान आयोगय् उजुरी बीवं अख्तियारया निर्देशनय् निर्माण ज्या दिनाच्वंगु खः ।

तर स्थानीय बासिन्दातय्सं धाःसा ज्या दिकूगु थें जक यानाः दुनें दुनें ज्या न्ह्याकाच्वंगु खँ धाःगु दु । हाकनं ज्या न्ह्याकेत ज्यामित वयाः सरसफाइया ज्या न्ह्याकेधुंकूगु खँ धाःगु दु । प्रतिबन्ध तयातःसां लुम्बिनी क्षेत्रय् उद्योग चायेकेगु ज्या मदिउगु खँ जनस्वास्थ्य तथा वातावरण केन्द्रया अध्यक्ष रामचरित्र शाहं धयादीगु दु ।वय्कलं धयादीगु दु, ‘विश्व सम्पदा धलखय् लाःगु तःधंगु सम्पदा संरक्षण यायेमाः धयागु सकस्यां सिउ । अय्सां सिमेन्ट उद्योगं प्रदूषण याइ धयागु सीक सीकं अज्याःगु उद्योगयात पनेगु ज्या जुयाच्वंगु मदु ।’

वंगु निगू दशक न्ह्यवंनिसें भैरहवा–लुम्बिनी सडक खण्ड जःखः अनियन्त्रित रुपं उद्योग चायेकेगु अनुमति बिउगुलिं अन दर्जनौं सिमेन्ट उद्योग चायेका हःगु दुसा थुकिया प्रत्यक्ष लिच्वः विश्व सम्पदा लुम्बिनीइ लानाच्वंगु दु ।थज्याःगु प्रदूषण याइगु उद्योग पनेगु अधिकार लुम्बिनी विकास कोषयाके नं मदु । विकास कोषं अन चायेकेत्यंगु उद्योग १५ किमि दुने लाः कि मलाः धयागु जक न्यनेकने यायेफुगु व वयां अप्वः मेगु अधिकार मदुगु खँ कोषया पुलांम्ह सदस्यसचिव अजितमान तामांगं धयादीगु दु ।थीथी अनुसन्धान कथं लुम्बिनीइ विश्व स्वास्थ्य संगठनं तोके यानातःगु मापदण्ड स्वयां ११ गुणा अप्वः वायु प्रदूषण जुयाच्वंगु दु । आः पुलांगु उद्योग मेथाय् सरे यायेगु व न्हूगु चायेके मबीगु ज्या मयायेकं लुम्बिनी क्षेत्र वायु प्रदूषणं मुक्त जुइ मफइगु खँ धाःगु दु ।