रानीपुखू दयेकेत पुनःनिर्माण विधि

पुनःनिर्माणया झ्वलय् आपालं विवादय् लानाच्वंगु रानीपुखू पुनःनिर्माणया निंतिं विधि क्वःछिउगु दु । राष्ट्रिय पुनःनिर्माण प्राधिकरणं रानीपुखू पुनःनिर्माणया विधि क्वःछिउगु खः । २०७२ साल बैशाखया भुखाचं क्षति जूगु रानीपुखू उगु हे दँय् पुनःनिर्माणया निंतिं पहल न्ह्याःगु खःसां वंगु स्वदँ न्ह्यःनिसें रानीपुखू पुनःनिर्माणं गति काये धाःसा फयाच्वंगु मदु ।

प्राधिकरणया प्रमुख कार्यकारी अधिकृत सुशील ज्ञवालीया संयोजकत्वय् च्वंगु पुरातत्वविद्सहितया छगू बैठकं रानीपुखू पुनःनिर्माण आः गुकथं यायेगु धइगु बारे निष्कर्ष पिकाःगु खः । प्राधिकरणं क्वःछिउगु पुनःनिर्माण विधिकथं आः रानीपुखू पुनःनिर्माण यायेबलय् न्हापां करिब १० फिट जाः तक गाः म्हुयाः अन च्वंगु घाय् लिनाछ्वइगु जूगु दुसा वयां लिपा अन च्वंगु दक्वं फि लिकयाः चा ल्वाकमज्याइकथं मुंकी ।

पुखुलिइ दुगु हाकुगु चाया तहय् थप छगू फिटतक हाकुगु चा हे तइगु व चाया तह तयार जुइवं करिब निगू फिट फि तइगु जूगु दु ।पुखूया सिथय् च्वंगु ब्व प्राधिकरण थम्हं हे निर्माण यायेगु निर्णय नं याःगु दु । विगतय् रिटेनिङ पःखाः ग्वःगु इलय् स्यंगु सतहयात हे आः पुलांगु हे तहकथं मिले यानाः निर्माण याइगु जूगु दु । पुखूया च्वय्या ब्वय् तपाःगु माअपा तयाः फः (पेटी) दयेकी ।

पुखूया सिधय् च्वंगु ब्व व पुखुलिं च्वय् न्यासि वनेगु लँया सिथय् तक अपां सोलिङ यानाः लाइक कंक्रिट तइगु जूगु दुसा वयां लिपा अपा लाइ । हालय् दयेकूगु ल्वहंया रिटेनिङ वालय् माअपाया आवरण तयाः पैदल मार्ग तहय् लाइम कंक्रिट तयेधुंकाः माअपाया हे रेलिङ वाल तइगु जूगु दु । पैदल मार्गय् अपाया सोलिङ व लाइक कंक्रिट यानाः निगू इन्च ख्वातुक हाकुगु ल्वहं लाइगु जूगु दु ।

थुकथं हे रानीपुखू पुनःनिर्माणया निंतिं क्वःछिउगु विधिकथं आः पुखुलिइ स्वाहाने त्वाथलय् च्वनेगु निंतिं ल्वहंया फः तयाः पिनें मांअपां भुनेगु नापं पुखूया संरक्षण व निर्माण यायेबल पूर्व व उत्तरपाखेतकं ल्वहंया हे फः तइगु जूगु दु । पिनेपाखें अपां हीकाः मौलिकता व एकरुपता पिज्वइकथंया स्वाहाने निर्माण याइ ।

पुखुलिइ लःया निंतिं पूर्वपाखे बोरिङया व्यवस्था यायेगु व थाय्थासय् आकासे लः मुंकेगु संयन्त्र निर्माण यायेगु नं उगु बैठकं याःगु दु । पुखुलिइ लः मदिक्क वयेकातयेगु निंतिं मेलम्चीया पाइप लाइनलिसे स्वाइगु थाय्यात खुल्ला याइगु जूगु दुसा पुखूया च्वय्या सतहय् छुं मात्राय् चा तयाः हरियाली कायम याइ ।

रानीपुखूया दथुइ च्वंगु बालगोपालेश्वर देगःलिसे स्वानाच्वंगु ताँया निर्माण यायेबलय् ताःया जगनिसें लःया सतहतक ‘ड्राई सेल स्टोन वाल’ तयेगु व उकिया पिनेया ब्वये सम्भव दत्तले पुलांगु हे अपात प्रयोग याइगु जुयाच्वंगु दु । ताँया वृत्त–खण्ड व वयां च्वय्या भाग निर्माण यायेबलय् लाइम व सुर्खी मोर्टारया प्रयोग याइगु जूगु दु ।

लःया सतहनिसें च्वय् ताँतक निर्माण यायेबलय् नं सम्भव दत्तले पुलांगु हे अप्पा प्रयोग जुइ । ताँया पैदल मार्गय् हाकगु ल्वहतं पेभिङ यायेगु व ताँया जव व खवपाखे दाछिअपा प्रयोग यानाः १४ इन्चया पःखाः निर्माण यायेगु निर्णय नं प्राधिकरणं याःगु दु । बालगोपालेश्वर देगः प्रताप मल्लकाली ग्रन्थकुट )(शिखर) शैलीइ निर्माण यायेगु सम्बन्धय् थ्व स्वयां न्ह्यः हे निर्णय जुइधुंकूगु दु ।

मन्त्रिपरिषद्या वंगु माघ ४ गतेया बैठकं रानीपुखू व बालगोपालेश्वर देगः लगायत उगु लागाय् च्वंगु पुरातात्विक महत्वया संरचनाया पुनःनिर्माण प्राधिकरणं हे यायेगुकथं जिम्मेवारी बिउगु खः । बैठकय् पुरातत्व विभागया पूर्व महानिर्देशक विष्णुराज कार्की, वरिष्ठ स्ट्रक्चरल इन्जिनियर प्रेमनाथ मास्के, पुरुषोत्तम डंगोल व पूर्णबहादुर श्रेष्ठ, प्राधिकरणया वरिष्ठ डिभिजनल इन्जिनियर ध्रुव पौडेल व पुरातत्व अधिकृत भीष्म बाँस्कोटा लगायतपिनिगु सहभागिता दुगु खः ।

 

सम्बन्धित बुखँ

LEAVE YOUR COMMENTS