पाँचथरय् मांभाय् आन्दोलन तच्वल

येँ – पाँचथर जिल्लाया फाल्गुनन्द गाउँपालिकाय् च्वंगु फुक्क स्कूलय् मांभासं आखः ब्वंकेगु धकाः याःगु निर्णय विरुद्ध उच्च अदालतं याःगु फैसलां यानाः स्थानीय भाषाह्यमित आन्दोलित जूगु दु । उगु फैसला विरुद्ध स्थानीय लिम्बू विद्यार्र्थी मञ्च, किरात राई विद्यार्थी संघ, याक्थुङ युवा मञ्च व तामाङ घेदुङ संघं मंकाः रुपं प्रदर्शन याना वयाच्वंगु दु ।

वंगु शुक्रवाः नं उमिसं स्थानीय घुर्बिसे पञ्चमी बजारय् प्रदर्शन याःगु खः । प्रदर्शनकारीतय्सं भाषा विरोधीत होशियार, लिपि मास्न पाइँदैन, भाषा हाम्रो प्राण हो धइगु नारा थ्वयेकाः बजाः चाःहिलाःलि छगू सभा याःगु खः । सभाय् न्ववाःपिं वक्तातय्सं भाषा विरुद्ध षडयन्त्र याइपिं सुं नं मनूयात त्वःतेगु जुइ मखु धकाः न्ववाःगु खः ।

सभा लिपा आन्दोलनरत संस्थाया प्रतिनिधितय्सं गाउँपालिकाया कार्यवाहक अध्यक्ष देवित्राकुमारी आङदेम्बेयात ज्ञापनपौ लःल्हानादीगु खः । ज्ञापनपत्रय् गाउँपालिकां थःगु लागाय् च्वंगु स्कूलय् मांभासं आखः ब्वंकेगु धकाः याःगु पहल तसकं स्वागतयोग्य खः धासें थुकियात न्ह्याथे यानाः निरन्तरता बीमाः धकाः माग यानातःगु दु ।

फाल्गुनन्द गाउँपालिकापाखें थःगु क्षेत्रय् च्वंगु स्कूलय् मांभासं आखः ब्वंके दइ धकाः याःगु निर्णयया विरुद्ध उगु हे गाउँपालिकाया सत्तारुढ दल नेपाल कम्युनिष्ट पार्टीया गाउँपालिका सचिव इन्द्रकुमार नेम्बाङं उच्च अदालतय् मुद्दा दायर याःगु खः । उगु मुद्दाया सुनुवाई यासें उच्च अदालतं मातृभाषां आखः ब्वंकेगु गाउँपालिकाया निर्णय कार्यान्वयन याये मते धकाः अन्तरिम आदेश जारी याःगु खः ।