पुलांपिं न्यायाधीशपिं नं राष्ट्रपति जुइ दयेमाः

येँ (नेपालभाषा टाइम्स)- न्यायाधीश समाजं अवकाश कायेधुंकूपिं न्यायाधीशपिंत निर्वाचनं परिपूर्ति याइगु पदय् नियुक्त यायेत संवैधानिक प्रावधान पंगः मजुइगु खँ धाःगु दु । न्यायाधीश समाजं म्हिगः विज्ञप्ति पिकासें निर्वाचनपाखें परिपूर्ति याइगु पदय् सर्वोच्च अदालतया अवकाशप्राप्त न्यायाधीशपिं योग्य मजू धाःगु खँय् आपत्ति नं प्वंकूगु दु ।

बुधवाः जक सर्वोच्च अदालत बार एसोसिएसनया बैठकं सर्वोच्च अदालतया पुलांपिं न्यायाधीशपिं राष्ट्रपति निर्वाचनया नितिं उम्मेदवार जुइ मजिउगु धापू सार्वजनिक याःगु खः ।

वयां कन्हय् कुन्हु हे न्यायाधीश समाजं विज्ञप्ति जारी यानाः उकियात प्रतिवाद यासें धाःगु दु, ‘सेवा निवृत्त प्रधानन्यायाधीश वा न्यायाधीशपिं गुगुं नं सरकारी पदय् नियुक्तिया नितिं ग्राह्य मजुइगु संवैधानिक व्यवस्थाया अभिप्राय नेपाःया संविधान कथं निर्वाचनपाखें पूर्ति याइगु पदय् उम्मेदवार जुइ जुइ दइ मखु धइगु अवश्य मखु ।’