आदिवासी जनजाति महोत्सव जुइगु

चितवन (रासस)- आदिवासी जनजातितय् भाषा, संस्कृति, प्रवद्धन यायेगु ताःतयाः चितवनय् छगू महोत्सवया जुइगु जूगु दु । वइगु चैत ९ गते निसें १८ गते तक नारायणी खुसि सिथय् ‘न्हापांगु आदिवासी जनजाति सांस्कृतिक तथा व्यापार महोत्सव’ जुइत्यंगु खः ।

आदिवासी जनजाति महासंघया ग्वसालय् जुइत्यंगु थ्व महोत्सवया तयारी ज्या जुयाच्वंगु खँ छगू पत्रकार सम्मेलन यासें महासंघं धाःगु दु । पत्रकार सम्मेलनय् बिउगु जानकारी कथं महोत्सवय् स्वसःगु प्रदर्शनी कक्षा दइ । महोत्सवय् निगू लाखं मल्याक दर्शकतय्सं अवलोकन याइगु अनुमान यानातःगु दु ।

भरतपुर भ्रमण दँ २०२४यात लक्षित यानाः महोत्सवया ग्वसाः ग्वयागु खँ महासंघया चितवन अध्यक्ष व महोत्सवया संयोजक महेन्द्र दुरां कनादीगु दु । वय्कलं धयादीगु दु, ‘आदिवासी जनजातितय् भाषा, संस्कृति संरक्षण यायेत महोत्सवया ग्वसाः ग्वयागु खः । थुकिं भरतपुर भ्रमण दँया प्रवद्र्धनय् नं ग्वाहालि यायेगु लक्ष्य तयागु दु ।’

महोत्सवया इलय् न्हियान्हिथं १७ गू जातिया सांस्कृतिक प्रदर्शनी जुइगु जानकारी नं बिउगु दु । चितवनय् जक थौंकन्हय् ४० गू आदिवासी जनजातियापिं च्वना वयाच्वंगु दु । चितवनया जनसंख्या ४६ प्रतिशत आदिवासी जनजाति दु । थन थारुत लिसें दराई, कुमाल, तामाङ, बोटे, चेपाङ, मगर, गुरुङ, थकाली, नेवाः, दुरा, राई, लिम्बु, भुजेल, ह्योल्मो, बराम लगायतया जनजातिपिं च्वना वयाच्वंगु दु ।