आवंलि निजी प्रयोगशालाय् नं कोभिड परीक्षण यायेदइगु

येँ –सरकारं आवंलि निजी प्रयोगशालाय् नं कोरोना भाइरसया परीक्षण यायेदइगु खँ धाःगु दु । स्वास्थ्य तथा जनसंख्या मन्त्रालयं थौं (सोमवाः) याःगु नियमित मिडिया ब्रिफिङय् प्रवक्ता डा. विकास देवकोटां आवंलिं निजी प्रयोगशालाय् नं कोभिडया परीक्षण यायेदइगु खँ धाःगु दु । थुकिया निंतिं प्रयोगशालाया न्यूनतम मापदण्डया निर्देशिका जारी यानागु खँ वय्कलं धयादीगु दु ।

वय्कलं मापदण्ड पूवंकेधुंकाः मन्त्रालयपाखें स्वीकृति कयाः परीक्षण न्ह्याकेफइगु खँ धयादीगु दु ।

मिडिया ब्रिफिङया झ्वलय् वय्कलं आःतक नेपालय् ५३ हजार ५३४ गू परीक्षण जुइधुंकूगु व थुकी मध्ये ४३ हजार ६३ गू आरडिटीपाखें व १० हजार ४७१ गू पिसिआर विधिपाखें परीक्षण जूगु खँ धयादिल । अथेहे स्वनिगलय् च्याम्ह आइसोलेसनय् दुगु व स्वनिगलं पिने ९८ म्ह आइसोलेसनय् दुगु, अथेहे २० हजार १९५ म्ह क्वारेन्टाइनय् दुगु जानकारी नं वय्कलं बियादीगु दु ।