प्रधानमन्त्रीं स्वनिगःया नेवाः सांसदतय्गु खँ मन्यन
येँ – प्रधानमन्त्री केपी ओलीं आः विवादय् वयाच्वंगु गुथि विधेयक लित हे काये मायेक खराब मखु धासें विधेयक लित मकायेगु संकेत बियादीगु दु । अथे खःसां स्वनिगःया आपालं सांसद लगायतया जनप्रतिनिधितय्सं विधेयक लित कायेमाः धकाः सुझाव बिउगु जुयाः आः मन्त्रिपरिषदय् थुकिया बारे सहलह याये धयादीगु दु ।
विवादित गुथि विधेयक बारे सहलह यायेत म्हिगः प्रधानमन्त्री निवास वालुवाटारय् ग्वसाः ग्वःगु स्वनिगःया नेकपा सांसद, मेयर, वडा अध्यक्ष लिसें पार्टी कार्यकर्तातय् दथुइ यानादीगु मुँज्याय् थःगु बिचाः तसें वय्कलं थ्व खँ कनादीगु खः ।
मुँज्याय् सहभागी छम्ह जनप्रतिनिधिं कनादी कथं नेकपा संसदीय दलया उपनेता सुवास नेम्बाङं सञ्चालन यानादीगु उगु सभाय् न्ववाःपिं येँ मनपाया मेयर विद्यासुन्दर शाक्य, प्रतिनिधिसभाया सांसद कृष्णगोपाल श्रेष्ठ, जीवनराम श्रेष्ठ लिसें प्रदेशसभाया सांसदपिं डा. अजयक्रान्ति शाक्य, राजकाजी महर्जन, बसन्त मानन्धरपिंसं विधेयकया विरोधय् तःधंगु हे आन्दोलन जुइधुंकूगु व थुकिं यानाः पार्टीयात तःधंगु नोक्सानी याइगु सम्भावना दुगुलिं आः तत्कालया लागिं विधेयक लित हे कायेमाः धकाः सरकारयात सुझाव बियादीगु खः ।
लिसें अन न्ववाःपिं छुं वडा अध्यक्षपिंसं तकं थ्व इलय् विधेयक लित कायेमाः धकाः सरकारयात सुझाव बिउगु खः । ख्वपया सांसद महेश बस्नेत छम्हेस्यां धाःसा विधेयक लित कायेगु सिबें नं थ्व विधेयकया बांलाःगु पक्षयात कयाः जनताया छेँय् छेँय् वनेमाःगु बिचाः तयादीगु खँ नं अन दुथ्याःम्ह छम्ह सहभागीं ‘नेपालभाषा टाइम्स’ यात कनादिल ।
सकस्यां खँ न्यनेधुंकाः अन्तिमय् न्ववानादीम्ह प्रम ओलीं थ्व छगू विधेयक लित काल धाःसा कन्हय् मेमेगु विधेयक नं लित काये माल धकाः विपक्षी पार्टीतय्सं दबाब बिउ वइगु सम्भावना दु धासें विधेयकया बांलाःगु पक्ष बारे जनतायात थुइकेत पार्टीया कार्यकर्तात ब्वाँय् वनेमाःगु खँ कनादीगु खः ।
वय्कलं अन न्ववाःपिं सांसदतय्सं विधेयक बारे बांलाक अध्ययन तकं मयाःनि धासें गुथिया सम्पत्ति गुथियारतय्गु मखु गुथियागु जुइ धइगु खँ विधेयकय् उल्लेख दुगु दावी नं यानादीगु खः । थ्व स्वयां न्ह्यः म्हिगः हे नेकपालिसे आवद्ध स्वनिगःया सांसदतय्सं सिंहदरवारय् पार्टीया वरिष्ठ नेता माधव नेपालयात नापलानाः विधेयक लित कायेमाःगु खँ तःगु खःसा नेता नेपालं वालुवाटारय् थ्व खँ न्ववायेगु धयादीगु खः । तर वय्कलं अन धाःसा छुं न्वमवाःगु खँ धाःगु दु ।
LEAVE YOUR COMMENTS