छन्हुं हे झिंप्यम्हेसिके संक्रमण खनेदत

येँ – नेपालय् थाैं छन्हु हे झिंप्यम्ह मनूयाके कोरोना संक्रमण खनेदुगु दु । संक्रमण खनेदुपिं मध्ये झिंनिम्ह उदयरपुरय् खःसा निम्ह चितवनय् खः । चितवनय् बेलायतं वःपिं मां व काय्याके कोरोना संक्रमण पुष्टि जूगु दुसा उदयरपुरय् संक्रमण खनेदुपिं मध्ये च्याम्ह मनू भारतीय जूगु खँ धाःगु दु ।

थुपिं च्याम्हं उदयपुरया छगू मस्जिदय् सुलाच्वंपिं खः । उदयपुरया मस्जिदय् भारतीयत सुलाच्वंगु जानकारी वयेवं सुरक्षाकर्मीत वनाः उमिगु स्वाब परीक्षण याकूगु खः । स्वाब परीक्षणय् भारतीय च्याम्हेसिके कोरोना संक्रमण खनेदुगु खः । उमिगु स्वाब थप परीक्षणया निंतिं येँय् छ्वयाहःगु खँ धाःगु दु । उदयपुरय् संक्रमित खनेदुपिं मेपिं प्यम्हेसिया बारे धाःसा पूवंक जानकारी वःगु मदुनि ।