ब्राजिलया यानोमामी आदिवासीयात नं कोरोनाया संक्रमण

येँ – ब्राजिलया एमेजोन जंगलय् च्वनीपिं यानोमामी आदिवासी समुदायया छम्ह ल्याम्हयात नं कोरोना भाइरसपाखें संक्रमण जूगु दु ।

मेमेगू समुदायनाप बिस्कं च्वनीपिं व विदेशी रोगतपाखें कमजोर कथं कयातःगु यानोमामी समुदाययात कोरोनाया संक्रमण जूगु थ्व न्हापांगु घटना खः । झिंन्यादँया उम्ह संक्रमितयात उत्तरपूर्वी राज्य रोराइमाया राजधानी बोआ भिस्ताया अस्पतालय् भर्ना याःगु दु ।

ब्राजिलया स्वास्थ्य मन्त्री लुइज हेनरिक मन्डेटां यानोमामी समुदायलय् संक्रमण खनेदुगु तसकं चिउताया खँ जूगु धासें दुःख प्वंकादिल । वय्कलं धयादी, ‘आदिवासी समुदाययात संक्रमण जुइगु खँय् झी तसकं सचेत जुइमा, विशेष यानाः पिनेया दुनियाँ नाप तसकं म्हो जक सम्पर्क दुगु समुदाय प्रति सचेत जुइमा ।’

करिव २७ हजार जनसंख्या दुगु यानोमामी समुदाय २०औं शताब्दी तक पिनेया दुनियाँ नाप पूर्ण रुपं तापक च्वनाच्वंगु खः । सन् १९७०स जूगु मलेरिया व तःकैपाखें नं थुगु समुदाय तकसं प्रभावित जूगु खः ।

अथेहे ब्राजिलय् आः तक थीथी आदिवासी समुदायया ७म्ह मनूतय्त कोरोनाया संक्रमण जुइधुंकूगु पुष्टि जूगु दु । उकी मध्ये दकलय् न्हापां २०दँया कोकामा आदिवासी समुदायया मिसायात छवाः न्ह्यः संक्रमण जूगु खः । ब्राजिलय् ३००गू आदिवासी समुदायया ८ लख जनसंख्या दु ।