स्वनिगलय् मेय् ला छाय् अभाव जुल ?

येँ – बजारय् मेय् मवयेवं येँया आपालं धयाथें थें मेय्या ला पसः बन्द जूगु दु । वंगु चैत २४ गते तक येँया थीथी थासय् छुं छुं मेय्या ला मीगु पसः चाःगु खःसां म्हिगः निसें धाःसा फुक्कं धयाथें पसः बन्द जूगु दु ।

व्यापारीतय् कथं वंगु चैत ११ गते ‘लकडाउन’ शुरु जुइधुंकाः छुं न्हिं पसः बन्द जूगु खःसा पाहाँचः¥हेया निंतिं हयातःगु मेय् ल्यनाच्वंगु लकडाउन लिपा नं छुं न्हि तक मेय्या ला न्याये दुगु खः । आः धाःसा व्यापारीतय्सं हयातःपिं मेय् दक्वं मदयेवं ला पसः बन्द जूवंगु खः ।

स्वनिगःया व्यापारीतय्सं बाराया जितपुरं मेय् न्याना हयेगु यानाच्वंगु खः, तर लकडाउन शुरु जुइधुंकाः जितपुरया मेय्या हाटबजाः नं बन्द जुइगु स्वनिगलय् मेय् हयेगु नं दिउगु खः ।

स्वनिगःया व्यापारीतय्सं हप्ताय् निकः जितपुरया हाट बजारं म्येय् न्याना हइगु खः । उकथं हे नेपालगञ्ज व सप्तरीया सखुवा हाट बजारं नं स्वनिगलय् म्येय् आपूर्ति जुयाच्वंगु खः । लकडाउनया कारणं थ्व निगुलिं हाट बजाः नं बन्द जुयाच्वंगुलिं मेय्या आयात थप्प जूवंगु खः ।

थ्व बाहेक स्वनिगः जःखःया गामं नं हयेगु यानाच्वंगु खःसां लकडाउनया कारणं गामं नं मेय् हयेत समस्या जुयाच्वंगु दु । व्यापारीतय् कथं थौंकन्हय् थःपिं हे गामय् वनाः मेय् न्याःवनेगु नं सम्भव मदु, विचौलिया पाखें न्यायेगु कुतः जुयाच्वंसां नं मेय्या भाः थहां वंगुलिं न्यायेफइगु अवस्था मदु ।

विचौलियापाखें गामं मेय् हयेमाल धाःसा छगू किलो लाया भाः खुसः निसें न्हय्सं तक तूवइगु खँ धासें उकथं लाः मीगु व्यवहारिक मजूगु खँ उमिसं धाःगु दु । गामं मेय् हयाः थिकेगु भावं मिल धाःसा सरकारं कारबाही याइ, अथे जुयाः नं व्यापारीत गामं मेय् हयेत ग्यानाच्वंगु दु ।

स्वनिगलय् आपालं धयाथें मेय् दुत हइगु बजाः जितपुरय् नं भारतं मेय् आपूर्ति जुयाच्वंगु मदु । व्यापारीतय् कथं लकडाउन क्वचाये धुंकाः नं स्वनिगलय् छुं न्हिं मेय्या ला मदयेफु । भारतं जितपुरय् मेय् छ्वया महल धाःसा स्वनिगलय् नं लाया अभाव जुइ ।

सरकारी तथ्यांक कथं स्वनिगलय् जक न्हिं न्हय्सः निसें च्यासः मेय् खपट जुयाच्वंगु दु । थ्व फुक्कं मेय्या स्रोत धाःसा भारत लिसे सीमाना स्वाःगु हाट बजाः हे खः ।