आकस्मिक अवतरण याःपिं पाइलटतय्के स्पष्टीकरण

येँ – लुक्लां पर्यटक ज्वना वःगु हेलिकप्टर मध्ये मंगलवाः आकस्मिक अवतरण याःपिं च्यागः हेलिकप्टया पाइलटतय्त स्पष्टीकरण काःगु दु । नेपाल नागरिक उड्डयन प्राधिकरणं मौसम स्यनाः आकस्मिक अवतरण याःपिं पाइलटतय्के स्पष्टीकरण काःगु खः । प्राधिकरणया महानिर्देशक राजन पोखरेलं पाइलटतय्के स्पष्टीकरण कयागु मतलब आकस्मिक अवतरणय् हे न्ह्यसः थनेगु निंतिं मखसे भविष्यय् थप सजग जुइगु निंतिं सुझाव बीत जूगु खँ धयादीगु दु ।

सगरमाथा क्षेत्रया प्रवेशद्वार जुयाच्वंगु लुक्ला विमानस्थलं मंगलवाः यात्रुत सहित ब्वयावःगु च्यागः हेलिकप्टरं सोलुखुम्बु, रामेछाप, सिन्धुली व काभे्रपलाञ्चोकया थीथी थासय् आकस्मिक अवतरण याःगु खः । थथे आकस्मिक अवतरण याःगु हेलिकप्टर येँय् थ्यनेधुंकूगु दु ।देय्न्यंकं मौसम खराब जुयाच्वंगु इलय् नं सोलुखुम्बु छथाय्या मौसमया जानकारी कयाः हेलिकप्टर ब्वयेकूगुलिं थथे आकस्मिक अवतरण यायेमाःगु खँ पिहां वयाच्वंगु दु ।

हेलिकप्टर कम्पनीतय्सं नाफा जक स्वयाः हेलिकप्टर ब्वयेके बिउगुलिं छक्वलं हे च्यागः हेलिकप्टरं आकस्मिक अवतरण यायेमाःगु द्वपं लानाच्वंगु दु । लुक्लां ब्वइगु हेलिकप्टरं पहाड च्वं च्वं ब्वया वयेगु यायेमाः । मौसम खराब जूगुलिं मंगलवाः थुपिं हेलिकप्टरत दूधकोशी खुसि न्ह्याः वनाच्वंथासं सुर्के जुयाः ब्वया वःगु खः ।

मंगलवाः आकस्मिक अवतरण सुरक्षाया दृष्टिं पाइलटतय्सं याःगु सही निर्णय जूसां भविष्यय् थज्याःगु इलय् सचेत जुइमाःगु खँ प्राधिकरणया निर्देशक पोखरेलं बिबिसीलिसे खँ ल्हासें धयादीगु खः । वय्कलं धयादीगु दु, ‘पाइलटतय्सं उगु इलय् गुगु निर्णय यात व सही खः ।

तर पोस्ट मनसुन थेंज्याःगु आःया अवस्थाय् भविष्यय् अज्याःगु जोखिम नाले मजिउ धयागु खँय् सचेत याकागु दु । छाय्धाःसां न्हापा नं थज्याःगु मौसमय् यक्व दुर्घटना जूगु दु । ’वय्कलं न्हापा जूगु दुर्घटनायात ध्यानय् तयाः छुं नं हालतय् खसु दुने दुहां वनाः हेलिकप्टर मब्वयेकेगु रणनीति कथं मंगलवाः पाइलटतय्त न्ह्यसः थनागु खँ धयादीगु दु ।

वय्कलं धयादीगु दु, ‘खसु दुने दुहां वनेधुंकाः सिमा व डाँडा न्यानाः दुर्घटना जूगु बांमलाःगु अनुभव झीके दु । खसु दुने दुहां वंगु अवस्थाय् अवतरण यायेत थाय् लुइकेत हे थाकुइगु जूगुलिं भचा जक शंका दुसां लिक्कसं लाःगु सुरक्षित थासय् अवतरण यायेत धयागु दु ।’ युरापेली संघं थौंकन्हय् नेपाःया हवाइ सेवायात हाकुगु धलखय् तयातःगुया मू कारण नेपाली हेलिकप्टरय् खराब रेकर्डया कारणं नं खः ।

सन् २०१० लिपा जक नेपालय् १३ गू हेलिकप्टर दुर्घटना जुइधुंकूगु दु ।हेलिकप्टर ब्वयेकेगु निंतिं १ हजार ५०० मिटर व जहाज ब्वयेकेगु निंतिं ५ किलोमिटर भिजिबिलिटी माः । मेखे शनिवाः निसें खराब मौसम जुयाच्वंगुलिं लुक्ला विमानस्थलं जहाज नं ब्वये फयाच्वंगु मदु ।

जहाज ब्वयेके मफुगुलिं अन पर्यटकतय् भीड जुयाच्वंगु दु । होटलय् म्वःम्वः पर्यटकत लानाच्वंगु दु । मौसम खराब जुइगु कारणं लुक्ला विमानस्थलय् दछिया दुने हे तःक्वः विमान ब्वयेमफइगु जुइ । तर थन सतक सञ्जाल मदुगुलिं पर्यटकतय्सं न्ह्याबलें सास्ती फयेमालाच्वंगु खँ स्थानीयतय्सं धाःगु दु ।