मनपाया ‘मिर्गौला बचाउ’ अभियान

येँ -येँ मनपाया मेयर विद्यासुुन्दर शाक्यं थौंकन्हय् विश्वन्यंकं आतंक जुयाः न्यना वनाच्वंगु कोरोना भाइरसपाखें नेपाःमित ग्यायेम्वाःगु खँ कनादीगु दु । आः तक नेपालय् कोरोना प्रभावित छम्ह तकं मलूनिगु व थुकिं कयाः सुयां मृत्यु तकं मजूगु कारणं डाक्टरतय्सं नं आतंकित जुइम्वाः धकाः सुझाव बियाच्वंगु खँ नं वय्कलं कनादिल ।

थनया लुति अजिमा देगः लागाय् जीर्ण जुयाच्वंगु फल्चा पुनर्निर्माण यायेगु लागिं म्हिगः जूगु शिलान्यास ज्याझ्वलय् न्ववासें मेयर शाक्यं उगु खँ कनादीगु खः । वय्कलं धयादिल, ‘थःगु स्वास्थ्यप्रति भचा सजग जुल धाःसा कोरोना खनाः ग्यायेमाःगु आवश्यकता दु । मनपां ल्वय् जुइकाः वासः यायेगु मखु ल्वय् हे मजुइकेगु उपाय बारे ज्या यानाच्वंगु दु ।’

आः वइगु वैशाखंनिसें महानगरय् ‘मिर्गौला बचाउ’ अभियान न्ह्याकेगु तयारी जुयाच्वंगु खँ कँसें नगरवासीया छेँय् छेँय् हे वनाः जलस्यँ जाँच यायेगु व छुं खराबी दुसा तुरुन्त वासः याकेगु लागिं थ्व अभियान न्ह्याकेत्यनागु खँ कनादिल । वय्कलं धयादिल, ‘मनूतय्सं थःगु मोटरसाइकल बरु टाइम टाइमय् वनाः सर्भिसिङ याकाच्वनी, थःगु स्वास्थ्य धाःसा गबलें सर्भिसिङ याइ मखु ।’