लुम्बिनीइ प्रदूषण अप्वःगु खँय् सरोकारवालातय् चिउताः

येँ – बुद्ध जन्मस्थल लुम्बिनीइ प्रदूषण अप्वया वनाच्वंगु धइगु समाचार न्हूगु मखसे धुंकल । नेपाः व भारतया सीमा लिक्क लाःगु थुगु थासय् औद्योगिक व सवारी साधनया चाप अत्याधिक मात्राय् अप्वयेवं लुम्बिनीइ वातावरणीय प्रदूषण तःधंगु समस्या जुयाच्वंगु दु । थ्व हे झ्वलय् बुद्ध जन्मस्थल लुम्बिनी व थ्व नाप सम्बन्धित नापं उकिया जःखः प्रदूषण अप्वया वनाच्वंगु खँय् सरोकारवालातय्सं चिउताः प्वंकूगु दु ।

लिसें प्वया वनाच्वंगु प्रदूषणपाखें लुम्बिनी व उकिया जःखः बचे यायेत सकलें सचेत जुइमाःगु खँय् नं इमिसं बः बिउगु दु । नेपाल वातावरण पत्रकार समूह (नेफेजं) ग्वसाः ग्वःगु लुम्बिनीइ औद्योगिक प्रदूषण संचार बहस सम्बन्धी ज्याझ्वलय् नवाःपिं वक्तातय्सं लुम्बिनीलिसें बुद्ध जन्मस्थल व बुद्धलिसे स्वानाच्वंगु कपिलवस्तु, रुपन्देही, नवलपरासीया रामग्राम थेंज्याःगु खुल्ला संग्रहालयया रुपय् दयाच्वंगु थासय् दकलय् अप्वः औद्योगिक प्रदूषणया कारणं वातावरणीय समस्याय् लानाच्वंगु धासें इलय् उकिया विकल्प मालेत नं इनाप याःगु दु ।

ज्याझ्वलय् प्रदेश नं ५ या उद्योग, पर्यटन, वन तथा वातावरणमन्त्री लिला गिरीं लुम्बिनी, बुद्ध जन्मस्थल व थ्व लिसे सम्बन्धित क्षेत्रय् लानाच्वंगु उद्योगया कारणं अन्तर्राष्ट्रिय जगतय् तकं नकारात्मक सन्देश वनाच्वंगु धासें थ्व सकसिगुं चिउताःया विषय जूगु खँ धयादिल ।

लिसें वय्कलं गुकथं उद्योग, कलकारखानाया कारणं उगु क्षेत्रय् प्रदूषण अप्वयाच्वंगु खः, उकियात मुक्त यायेत दकलय् न्हापां उद्योगीत हे सचेत व तयार जुइमाः धयादिल । लिसें प्रदेश सरकारयापाखें फत्तले उद्योग, कलकारखानाय् अन्तर्राष्ट्रिय मापदण्डया प्रविधि जडान यानाः उद्योगयात प्रदूषणमुक्त दयेकेत कुतः यायेगु व उकिया निंतिं उद्योगीतय्सं नं ग्वाहालि यायेत वय्कलं इनाप यानादिल ।

सम्बन्धित बुखँ

LEAVE YOUR COMMENTS