किपुलिइ मन्त्री महर्जनयात हन
किपू (नेपालभाषा टाइम्स)÷ बागमति प्रदेशय् नेवाः भाय् लागू यायेगु निंतिं विधेयक न्ह्यब्वयेगु लिसें विधेयक पारित यायेत महत्वपूर्ण योगदान यानादीगुलिं बागमती प्रदेशया संस्कृति, पर्यटन व सहकारी मन्त्री पुकार महर्जनयात शनिवाः किपू नगरय् तःजिक हंगु दु । सांस्कृतिक बाजं थाना सुभाय् ¥याली यानाः किपूया नीस्वंगू थीथी खलः पुचःपाखें मंकाः कथं सुभाय् पौ लःल्हाःगु दु ।
मन्त्री महर्जनयात पांगाय् च्वंगु छेँनिसें हे सांस्कृतिक बाजं थानाः ¥याली यानाः पांगाया लाछिइ दबुलिइ हयाः खेँ सगं, धौ सगं बियाः बेतालिं चिकाः हंगु खः । थ्वयां लिपा सुभाय् ¥याली पांगाया ध्वाकासि जुया सल्यांचा, खासी बजाः, कुतुझ्वः, चाफः जुयाः बाघभैरव लागाय् थ्यंकाः छगू सभायासें हाकनं बेतालिं चिकाः सगं बियाः हनेज्या याःगु खः । थ्व इलय् थाय् थासय् किपूया थीथी खलः पुचः व जनतापाखें मन्त्री महर्जनयात ख्येँ सगं बियाः सुभाय् देछाःगु खः ।
ज्याझ्वलय् किपू नगरपालिकाया उपप्रमुख शुभलक्ष्मी शाक्य सुनितां भिंतुना न्वचु बियादिसें आःया अवस्थाय् भाषा विधेयकयात कार्यान्वयनया निंतिं नेवाःत हे सचेत जुयाः न्ह्याः वनेमाःगु खँय् बः बियादिल ।
अथेहे नेवाः देय् दबू स्वनिगः विशेष प्रदेशया नायः श्रीकृष्ण महर्जनं बागमती प्रदेशय् भाषा विधेयक संसदय् न्ह्यब्वयेगु नापं पारित यायेगु निंतिं मन्त्री महर्जनं तःधंगु योगदान यानादीगु नापं भाषा विधेयकं सच्छिदँ न्ह्यःनिसेंया न्ह्याका वयाच्वंगु नेवाःतय्गु भाषा आन्दोलनया छुं छुं माग पूवंगुलिं वय्कःयात सुभाय् देछायेमाःगु खः धयादिल ।
ज्याझ्वलय् मन्त्री पुकार महर्जनं भाषा विधेयक हयेगु निंतिं जूगु ज्या न्ह्यथँसें उकियात कार्यान्वयनया निंतिं अझं हाथ्या दुगु खँ धयादिल । थ्व झ्वलय् वय्कलं याकनं हे नियमावली दयेकेगु निंतिं ज्या जुइगु खँ नं धयादिल ।
ज्याझ्वः नेवा देय् दबू, किपू नगर समिति, कपाली समाज, किपू, कीर्तिपुर खड्गी समाज हलिं नेवाः गुथि अमल्सि कचा, श्रीपञ्चमी मानन्धर गुथि किपू, हलिं नेवाः गुथि गःछेँ कचा, ज्यापु महागुथि नेपाः किपू नगर समिति, हलिं नेवाः गुथि किपू कचा, आदिवासी नेवाः राजनैतिक अभियान किपू नगर समिति, जगतपाल महाबिहार, बाघभैरब माली गुथि, हलिं नेवाः गुथि, वनस्पती अनुसन्धान कचा किपू, प्रतिभा साहित्य परिवार, गोरखनाथ गुथि अमल्सि, पवित्र कुटी विहार, गौत्तम बुद्ध विहार, जीवनयोग प्रयोगशाला, नेवाः एफ.एम. अनक मिडिय, नाती पाकः स्मृती कोक्ष्, कीर्तिपुर पथ–प्रदर्शक एसोशियसन, कीर्तिपुर बजार ब्यवस्थापन समाज, रोटरी क्लव अफ कीर्तिपुर व कीर्तिपुर दीखु बिकास समितिया ग्वसालय् जूगु खः ।
LEAVE YOUR COMMENTS