अर्लि इलेक्सन सम्भव मदु

येँ – सत्तारुढ नेपाली कांग्रेसया नेतातय्सं प्रतिनिधि सभा विघटन यानाः न्ह्याः वनीगु सम्भव मदुगु खँ धाःगु दु । कांग्रेस नेता मीनेन्द्र रिजालं थःके प्रतिनिधिसभा विघटन बारे सहलह जूगु छुं जानकारी नं मदु धासें प्रतिपक्षी एमालेलिसे सहमति मयासे न्ह्याः वने थाकुइगु खँ धयादीगु दु ।

वय्कलं प्रधानमन्त्री शेरबहादुर देउवां एमसीसी पारित याःगु इलय् थें सुझबुझपूर्वक एमालेलिसे खँ ल्हानाः न्ह्याः वनेमाःगु खँ धयादीगु दु । एमालें लगातार संसद अवरुद्ध यानाच्वंगु अवस्थाय् नेकपा एसया नेता माधव नेपालं संसद विघटन यानाः न्ह्याः वनेमाःगु बिचाः तयेवं हाकनं संसद् विघटन यानाः अर्लि इलेक्सनय् वनीगु सम्भावना बारे चर्चा सुरु जूगु खः ।

थ्वहे दथुइ नेता रिजालं एमालेलिसे समझदारी मयायेकं प्रतिनिधिसभा विघटन यानाः निर्वाचनय् वने अःपु जुइमखु धासें स्थानीय तहया निर्वाचन नं मयायेगु व मेगु निर्वाचन नं यायेमफइगु अवस्था जुल धाःसा झन् तःधंगु समस्या वइ धयादीगु दु ।

अथेहे कांग्रेसया मेम्ह नेता रमेश लेखकं नं प्रतिनिधि सभा विघटन यानाः न्ह्याः वनेगु सम्भावना मदुगु खँ धयादीगु दु । वय्कलं सर्वोच्च अदालतं हे संसद् पूर्ण कार्यकाल दयेमाः धायेधुंकूगु अवस्थाय् संसद विघटन जुइ फइमखु धयादीगु दु । ‘संसद मन्ह्यात धाःसा विघटन याःसां जिउ धकाः सर्वोच्चं ब्याख्या याःगु मदु’ वय्कलं धयादिल ।

एमाले त्वःताः नेकपा एसय् वंपिं झिंप्यम्ह सांसदतय्त कारवाही मयायेकं संसद न्ह्याके मबीगु अडानय् दु ।

सत्ता गठबन्धनया प्रमुख दल माओवादी केन्द्रया प्रमुख सचेतक देव गुरुङं नं प्रतिनिधि सभा विघटनबारे छुं सहलह मजूनिगु खँ धासें ‘संविधानं थुलिमछि ई तक सदन चले मजुइगु परिकल्पना यानातःगु मदु, उकिं सल्लाह परामर्श यानाः सदन न्ह्याकेगु कुतः यायेमाः’ धयादीगु दु ।
सत्ता गठबन्धनया हे मेगु घटक जसपाया नेता लिसें संघीय मामिला मन्त्री राजेन्द्र श्रेष्ठं आः संसद न्ह्याकेगु निंतिं निगू जक विकल्प दुगु खँ धयादीगु दु । ‘छगू विकल्प धयागु सरकारयाके बहुमत दुगुलिं अवरोधया दथुइ नं सरकारं संसदय् विजनेश बियाः न्ह्याकेगु, मेगु धयागु राष्ट्रिय सहमति यानाः पंगः चिइकेगु’ वय्कलं धयादीगु दु ।

भंग देउवापाखें अस्वीकार
वर्तमान संसद भंग यानाः अर्लि इलेक्सनय् वनेगु माओवादी व नेकपा (एस) या प्रस्तावयात प्रधानमन्त्री शेरबहादुर देउवां अस्वीकार यानादीगु दु । माओवादी केन्द्रया अध्यक्ष पुष्पकमल दाहालं थ्व खँ कनादीगु खः । प्रतिपक्षी एमालें संसद अवरोध यानाच्वंगु कारणं आः संसद हे भंग यानाः अर्लि इलेक्सनय् वने नु धकाः थःपिंसं तयागु प्रस्तावयात प्रधानमन्त्री देउवां अस्वीकार यानादीगु खँ दाहालं कनादीगु खः ।

सम्बन्धित बुखँ

LEAVE YOUR COMMENTS