मेलम्चीया ठेक्का त्वाःथल

तर ल्यं दुगु ज्या गय् यानाः न्ह्याकेगु बिचाः हे मयाःनि

येँ – सरकारं मेलम्ची आयोजना दयेकेगु ज्या पूमवंकुसे त्वःतावंगु इटालियन कम्पनी सीएमसी दि राभेनालिसेया ठेक्का सम्झौता त्वाःथःगु दु । मेलम्ची खानेपानी विकास समितिया बिहिवाः च्वंगु बोर्ड बैठकं ठेक्का रद्द यायेगु क्वःछिउगु खः । आयोजनां म्याद बियातःगु इलय् तक नं लिसः मवयेवं ठेक्का सम्झौता रद्द मयात धाःसा कम्पनीं तयातःगु बैंक ग्यारेन्टी नं लिहां वनेफुगु सम्भावना दुगुलिं तुरुन्त हे निर्णय यानाः ठेक्का सम्झौता रद्द यानागु खँ धाःगु दु ।

आयोजनां आः सीएमसीं आयोजना ठेक्का कायेधुंकाः तयातःगु धरौती रकम जफत याइगु जूगु दु । सीएमसी लिसे ठेक्का रद्द याःसां आयोजनां आः ल्यं दुगु ज्या गुकथं यायेगु धयागु बारे धाःसा निर्णय याःगु मदुनि । आयोजनां आः गुकथं ज्या न्ह्याकेगु धयागु बारे थीथी विकल्प तयाः छगू प्रस्ताव तयार यानाः सरकारयात लःल्हायेगु खँ धाःगु दु ।

आयोजनाया कार्यकारी निर्देशक सूर्यराज कँडेलं सरकारं गुगु प्रस्ताव स्वीकृत यानाः निर्णय यात उकथं हे दृढतापूर्वक ज्या न्ह्याकेगु खँ धयादीगु दु । वय्कलं आः मेलम्ची पूवंकेगु निंतिं भचा नं लिमबाकेगु खँय् समिति सचेत दुगु खँ नं धयादीगु दु ।

मेलम्ची आयोजनाया ९० प्रतिशत धयाथें ज्या क्वचायेधुंकाः ठेकेदार कम्पनी सीएमसी ज्या त्वःताः बिसिउँ वंगु खः । कम्पनीया इटालीइ च्वंगु मू ज्याकू ताथ जूगु धासें ठेकेदारं ज्या त्वःतूगु खः । ज्या त्वःताः लिहां वनेत्यंगु इलय् कम्पनीया च्याम्ह इटलीयन कर्मचारीतय् राहदानी तकं सरकारं जफत याःगु खः ।

सम्बन्धित बुखँ

LEAVE YOUR COMMENTS