असोज १ गतेनिसें स्कुल चायेकेगु तयारी

येँ – येँ जिल्लाय् थ्वहे वइगु असोज १ गते निसें विद्यालय चायेके बीगु तयारी जुयाच्वंगु दु । कोरोना संक्रमण दर म्हो जुया वनाच्वंगुलिं विद्यालय चायेके बीगु तयारी जुयाच्वंगु खँ धाःगु दु । येँया प्रमुख जिल्ला अधिकारी कालीप्रसाद पराजुली लिसे स्वनिगःया स्थानीय तहया शिक्षा समितिया अधिकृत, जिल्ला शिक्षा एकाइ प्रमुख व अभिभावक संघया प्रतिनिधि सहितया म्हिगः च्वंगु बैठकं उगु निर्णय याःगु खः ।

बैठकं स्वास्थ्य मापदण्ड नालाः स्वनिगःया फुक्क स्थानीय तहयात असोज १ गतेनिसें विद्यालय चायेके बीगु निर्णय याःगु खः । बैठकं स्वास्थ्य अवस्थाया जोखिम स्वयाः सम्बन्धित स्थानीय निकायं हे विद्यालय चायेके बीगु निर्णय याये फइगु खँ धाःगु दु ।

सहायक प्रमुख जिल्ला अधिकारी कल्पना घिमिरे नेपालया कथं भदौ मसान्त तक स्थानीय तहया शिक्षा शाखां कोभिड–१९ संक्रमणया अवस्था, शिक्षक–कर्मचारीं खोप काःगु वा मकाःगु विवरण व विद्यालय सञ्चालनया ढाँचा जिल्ला कोभिड १९ संकट व्यवस्थापन केन्द्र (डीसीसीएमसी) य् पेश यायेमाः । उकिया आधारय् विद्यालयय् चायेकेगु अनुमति बीगु खँ धाःगु दु ।

येँ महानगरपालिकाया शिक्षा सम्बन्धी अधिकारी मोतिराज खनालं नं विद्यालय चायेकेगु तयारी जुयाच्वंगु जानकारी बियादीगु दु । छवाः तक विद्यालय सरसफाई व विद्यालय सामाजिक दूरी, स्वास्थ्य मापदण्ड पालना याकेत माःगु पूर्वाधार आदिया अध्ययन लिपा विद्यालय चायेकेगु तयारी जुयाच्वंगु जानकारी नं वय्कलं बियादीगु दु ।

उकथं हे यलय् धाःसा स्थानीय तहलिसे सहलह लिपा जक विद्यालय चायेकेगु कथं तयारी जुयाच्वंगु खँ सीदुगु दु । स्वनिगःया हे थीथी नगरपालिकां थःगु नगरपालिकाय् कोरोना संक्रमण म्हो जूगु धासें विद्यालय सञ्चालनय् हयेधुंकूगु दु ।

सम्बन्धित बुखँ

LEAVE YOUR COMMENTS