कंसंनिसें प्रचार प्रसारया ज्या बन्द, दकलय् संवेदनशील ई थ्वहे
येँ (नेपालभाषा टाइम्स)÷थुगुसी जुइत्यंगु निर्वाचनया झ्वलय् दकलय् संवेदनशील ई धयागु हे थनिंनिसें सुरु जुइगु खँ धाःगु दु । कन्हय् चान्हय् १२ बजेनिसें ‘स्थिर समय’ सुरु जुइत्यंगु दु । अर्थात् कन्हय् १२ बजेनिसें निर्वाचन सम्बन्धी प्रचार प्रचारया सम्पूर्ण ज्या बन्द जुइ ।
थ्व ल्याखं कन्हय् चुनाव प्रचारया अन्तिम न्हि खः । अन्तिम न्हि न्ह्यःने थ्यंकः वःलिसे निर्वाचन आचार संहिता उल्लंघनया घटना अप्वइगु जूगुलिं निर्वाचन आयोगं अझ अप्वः निगरानी तयाच्वनागु खँ धाःगु दु ।
निर्वाचन आयुक्त रामप्रसाद भण्डारीं कनादीकथं न्ह्याबलें नं चुनावया अन्तिम प्रचार प्रसारया सतिक थ्यनीबलय् आचार संहिता उल्लंघनया घटना अप्वइ । उकिं थ्व इलय् आयोगं फुक्क हे उम्मेदवारतय्त कडा निगरानी यानागु व विशेष ध्यान बियाच्वनागु खँ वय्कलं कनादीगु दु । न्हापाया तुलनाय् थुगुसी आचार संहिताया उल्लंघन म्हो जक जूगु दावी नं वय्कलं यानादीगु दु ।
निर्वाचन आयोगं न्हापा न्हापा जूसा सुधारात्मक कारवाही याइगु खःसा थुगुसी थःपिंसं दण्डात्मक कारवाही न्ह्याकाच्वनागु जूगुलिं नं आचार संहिता उल्लंघनया घटना म्हो जूगु अनुमान वय्कलं यानादिल । न्हापाया तुलनाय् आचार संहिता उल्लंघन याइपिं दण्ड सजाय बीगु ज्या धाःसा थुगुसी यक्व जूगु दु । थुकिं यानाः निर्वाचन आयोग गुलिखे मामिलाय् विवादय् नं लाःगु दु ।
LEAVE YOUR COMMENTS