रेशम चौधरीया मुद्दाय् हानं वहस
येँ (नेपालभाषा टाइम्स)÷नागरिक उन्मुक्ति पार्टीया नेता रेशम चौधरीया मुद्दाय् प्रत्यर्थी झिके यायेत सर्वोच्च अदालतं आदेश बिउगु दु । म्हिगः न्यायाधीशपिं टंकबहादुर मोक्तान व मनोजकुमार शर्माया मंकाः इजलासं प्रत्यर्थी झिके यायेगु आदेश बिउगु खः ।
सर्वोच्चया आदेशं आः रेशम चौधरीयात विपक्षी दयेकूपिं नं सर्वोच्च अदालतय् वयेमाःगु जूगु दु । थुगु मुद्दाया नितिं पियाच्वंपिं चौधरी लिसें बन्दीया पक्षय् सर्वोच्च अदालतं प्रत्यर्थी झिके यायेत आदेश बिउगु खः । प्रत्यर्थी झिके यायेगु आदेश नापं थुगु मुद्दाय् आः हाकनं बहस व सुनवाइ जुइगु व मिसिलया अध्ययन नापं प्रमाणया मूल्यांकन यायेगु ज्या जुइ ।
आः तक प्यक्वःखुसी पेशीइ तयेधुंकूगु चौधरीया मुद्दा निक्वः तक स्वये मजिउपिं न्यायाधीशया बेञ्चय् लाःगु खः । वंगु छवाः न्ह्यः नं पेशी दुगु खःसां नं वकुन्हु अदालतं स्थगित याःगु खः । चौधरी बाहेक मेगु गुंगू मुद्दा नं नापं तयाः सुनुवाइ याःगु खः ।
२०७७ भदौ ७ गते कैलालीया टिकापुरय् अखण्ड सुदूरपश्चिम व थरुहट प्रदेशया माग यानाः निगू पुचः दथुइ जूगु ल्वापुइ लानाः प्रहरीया एसएसपी लक्ष्मण न्यौपाने लिसें न्हय्म्ह प्रहरी सीगु खः ।
उगु घटनाय् चौधरी व लक्ष्मण थारु लगायतपिंत दोषी ठहर यासें कैलाली जिल्ला अदालत व उच्च अदालत दिपायलं कैद सजायँ न्यंकूगु खःसा चौधरीं थः घटनाय् संलग्न मदु धासें सर्वोच्च अदालत वंगु खः ।
थरुहट आन्दोलनया घटनायात कयाः सरकार छानविन कमिटी नीस्वंगु खःसा उगु कमिटीया प्रतिवेदन धाःसा सरकारं आः तक नं सार्वजनिक याःगु मदुनि । मेखे थरुहट आन्दोलनय् सजायँ फयाच्वंपिंसं उगु प्रतिवेदन सार्वजनिक यायेमाःगु माग यानाच्वंगु दु ।
LEAVE YOUR COMMENTS