‘कोशी’ विरोधयात माओवादीया समर्थन
येँ (नेपालभाषा टाइम्स)÷प्रदेश नं. १ या नां ‘कोशी प्रदेश’ तयेगु निर्णयया विरुद्ध न्ह्यानाच्वंगु पहिचानवादी आन्दोलनयात माओवादी केन्द्रया प्रदेश समितिं नं समर्थन याःगु दु । थ्व स्वयां न्ह्यः कोशी प्रदेश नां तयेगु प्रस्तावय् माओवादी केन्द्रं समर्थन याःगु खःसा प्रदेशसभाय् नं कोशी प्रदेशया पक्षय् हे मतदान याःगु खः ।
तर उकिया विरुद्ध प्रदेशन्यंकं न्ह्यानाच्वंगु आन्दोलन तःधं जुया वनेवं माओवादी केन्द्रया प्रदेशसभा कमिटीं थःगु हे निर्णययात अस्वीकार यासें प्रदेशया नां पुनःनामाकन यायेत थःपिं तयार दुगु खँ धाःगु दु ।
थ्वहे झ्वलय् जसपां नं प्रदेश नं. १ या नां ‘कोेशी’ यात अस्वीकार याःगु दु । थ्व स्वयां न्ह्यः थःपिनि लेटरहेडय् ‘कोशी प्रदेश’ धकाः च्वयातःगु नं गल्तीवस लाःवंगु खः धासें उकियात भिंकाः आःयात ‘प्रदेश १’ हे तयेगु खँ धाःगु दु । कोशी प्रदेशयात अस्वीकार यासें लिपा पुनःनामाकरण जुयाः मेगु नां वःसा जक थःगु लेटरहेडय् नं नां हिलेगु खँ नं धाःगु दु । पार्टीया प्रचार विभाग प्रमुख पूर्ण बस्नेतं छगू वक्तव्य बिसें थ्व खँ धाःगु खः ।
LEAVE YOUR COMMENTS