सक्व देय्या स्थापना दिवस
सक्व- येँय् नं १७ किलोमिटर उत्तर पूर्वी कुनय् लाःगु धार्मिक, ऐतिहासिक, सांस्कृतिक महत्वं जाःगु सक्व देय् पलिस्था जूगु लसताय् म्हिगः तःजिगु ज्याझ्वः यासें सक्व देय् पलिस्था दिं हन । सक्व देय् पलिस्था जूगु ३३२० औं (कलिगत संवत् १८०१–५१२१) क्यंगु लसताय् नसंचा उलेगु ज्या जूगु खः । सक्व व जःखःया थीथी सांस्कृतिक बाजं व सांस्कृतिक झाँकीलिसें सक्वया थीथी जात्राया इलय् पित हइपिं द्यःया नं प्रतिनिधित्व याकाः नसंचा उलेज्या याःगु खः ।
सक्व कटेजं शुरु जूगु नसंचा उलेगु ज्याझ्वः सक्व देय् चाःहिलाः उगु हे थासय् थ्यंकाः क्वचयेकूगु खः । ज्याझ्वलय् थीथी ख्यःया विशिष्ट व्यक्ति, स्थानीय लब्ध प्रतिष्ठित व्यक्ति व आपालं स्थानीयवासीया सहभागिता दुगु खः ।
नसंचा उलेधुंकाः सहभागि सकसिनं समय्बजि नकेगु ज्या जूगु खःसा वयां लिपा जूगु औपचारिक ज्याझ्वःया उलेज्या सक्व (शंखरापुर) नगरपालिकाया मेयर सुवर्ण श्रेष्ठं यानादीगु खः ।
ज्याझ्वलय् वय्कलं सक्व म्हसीका नांया सपूmया नं पितब्वज्या यानादीगु खःसा ज्याझ्वः ताःलाकेत थीथीकथं ग्वाहालि यानादीपिंत शंख आकारया लुमन्ति चिं नं वय्कलं लःल्हानादीगु खः ।सक्व देय् पलिस्था जूगु् लसताय् नसंचा उले स्वयां न्ह्यः सक्व जेसिज व रोटरी क्लब अफ सक्वं जलपान ज्याझ्वः याःगु खःसा औपचारिक ज्याझ्वः लिपा सकसितं नेवाः भ्वये नं नकेगु ज्या जूगु खः ।
थ्व हे झ्वलय् सक्व देय् स्थापना दिवसया लसताय् न्याम्ह गुर्जुपिं च्वनाः शान्ति स्वस्ति होम नं याःगु खः ।
LEAVE YOUR COMMENTS