अमेरिकी राष्ट्रपतित नेपाः छाय् वइ मखु ?

येँ –अमेरिकी आपालं राष्ट्रपतितय्सं भारतया भ्रमण यायेधुंकल । तर नेपाः भ्रमण यायेगुली धाःसा उमिसं चिउता मतः । भारतया
राजधानी दिल्लीनिसें नेपाःया भ्रमण छघौया जक जूसां नं अमेरिकी राष्ट्रपतितय्सं नेपाःया भ्रमण मयाइगु खँयात अर्थपूर्ण रुपं स्वयाच्वंगु दु ।
नेपाः व अमेरिका दथुइ कुटनीतिक सम्बन्ध स्थापन जूगु सन् १९४८ स खः ।

तर आः तक नं सुं हे अमेरिकी राष्ट्रपतिया नेपाः भ्रमण मजूगुलिं उकियात कुटनीतिक कथं अर्थपूर्ण रुपं काःगु खः । नेपाःया परराष्ट्र मामिलाया छुं मनूतय्सं नेपाः आर्थिक व कुटनीतिक ल्याखं अमेरिकाया प्राथमिकताय् मलाःगु खँ धाःगु दु । नेपाःया उत्तर स्वाःगु तिब्बतया मामिलाय् अमेरिकां चिउताः क्यनेगु यानाच्वंसां नं राष्ट्रपतीय हैसियतं उकियात नालेगु यानाच्वंगु मदु ।

कुटनीतिज्ञतय् कथं तिब्बतयात अमेरिकां प्राथमिकता बियाः स्वयेगु याःसां नं राष्ट्रपतिया हे नेपाः भ्रमणय् अमेरिकाया चिउताः मदुगु खँ धाःगु दु । पुलांपिं कुटनीतिज्ञपिनि कथं दकलय् न्हापा अमेरिकी राष्ट्रपतिया नेपाः भ्रमण बारे नेपाःया मुद्दा क्वामतू, मेगु देय्लिसे थें अमेरिका लिसे नेपाःया व्यापार लगानी नं मदु । नेपालं आर्थिक सहायता कायेगु बाहेक अमेरिकायात छुं नं कथंया लवः बी मफुगुलिं यानाः नं अमेरिकी राष्ट्रपतित नेपाः भ्रमणय् इच्छुक मजुयाच्वंगु खँ धाःगु दु । लिसें अमेरिकां नेपाःयात म्हो जक आंकलन यानाच्वंगुलिं नं अज्याःगु भ्रमण जुइ मफयाच्वंगु खः ।

नेपालय् पुलांम्ह राष्ट्रपति बाराक ओबामायात हयेगु कुतः जूगु खः । तर नेपाः सरकारं माःगु कुटनीतिक पहल मयायेवं उगु कुतः नं सितिं वन । अथे ला अमेरिकाया उपराष्ट्रपति स्पाइरो एग्न्यूं सन् १९७० व विदेशमन्त्री कोलीन पावेलं सन् २००२ स नेपाः भ्रमण याःगु खःसां नं राष्ट्रपतिया हे भ्रमण याकेगु निंतिं खास हे भूमिका म्हिते मफुगु खँ धाःगु दु ।