राष्ट्रिय अभिलेखालय बचे जुल, थापाथलीं अभिलेखाय चीकेगु सरकारी निर्णय लित काल
येँ (नेपालभाषा टाइम्स) – थनया थापाथलीइ च्वंगु राष्ट्रिय अभिलेखालययात अनं चीका छ्वयेगु सर्वोच्च अदालतया कुतः विफल जूगु दु। सर्वोच्चं अभिलेखालययात अनं चीकाः उगु थासय् थःपिनि पार्किब दयेकेगु कुतः याःगु खः । तर थीथी थासं वःगु तीव्र विवादं यानाः राष्ट्रिय अभिलेखालययात अनं चीकेगु निर्णय नेपाल सरकारं लित काःगु दु ।
राष्ट्रिय अभिलेखालय यदि अनं चीकाः मेथाय् तयेयंकल धाःसा अन च्वंगु २० निसें २५ प्रतिशत तक ऐतिहासिक महत्वया अभिलेखत नष्ट जुइ फइगु जूगुलिं थाय् हिलेगु निर्णय लित कायेत माग जुयाच्वंगु खः । राष्ट्रिय अभिलेखालय अनं चीकाः नारायणहिति संग्रहालयय् तयेगु नं खँ जूगु खः । तर संग्रहालयं थाय् बी मखु धायेवं हानं मेगु थाय् मालाच्वंगु खः ।
थ्वहे झ्वलय् वंगु असार २ गते च्वंगु मन्त्रिपरिषद् बैठकं सर्वोच्च अदालतयात माःगु थाय् नापसं च्वंगु नेपाली सेनाया चण्डी दलया जग्गा क्वपालाः मिले यायेगु व चण्डी दलयात मेथाय् जग्गा बीगु व्यवस्था यासें राष्ट्रिय अभिलेखालय आः गन दु अन हे तयेगु निर्णय याःगु खः । लिसें अभिलेखालयं आः उपभोग यानाच्वंगु १२ रोपनी जग्गा आः वयागु हे नामय् याना बीगु निर्णय नं याःगु दु ।
सरकारया थ्व निर्णयं यानाः अभिलेखालय मेथाय् सारे यायेम्वाःगु जक मखु कि थाय् सारे याये माःगु कारणं जुइगु आपालं क्षतिपाखें समेत बचे जूगु खँ अनया निमित्त महानिर्देशक शौभाग्य प्रधानांगं ‘नेपालभाषा टाइम्स’ यात कनादिल ।
सुशील कोइराला प्रधानमन्त्री जुयाच्वंगु इलय् वि.सं. २०७१ सालय् राष्ट्रिय अभिलेखालय चीकाः सर्वोच्च अदालतयात जग्गा बीगु निर्णय याःगु खः ।
कोरोनां यानाः सेवा प्रभावित
समुदायय् समेत न्यना वनाच्वंगु कोरोनाया संक्रमणं आः सरकारी ज्याकूत नं प्रभावित जुया वःगु दु। थ्वहे झ्वलय् थापाथलीस्थित राष्ट्रिय अभिलेखायया कर्मचारीतय्त समेत कोरोना संक्रमण खने दया वःगु खँ सीदुगु दु। कर्मचारीतय्त समेत कोरोना संक्रमण खने दयेवं मेपिंत संक्रमण मजुइमा धकाः अभिलेखालयया सेवा हे छुं न्हिया लागिं बन्द याःगु दु। ज्याकू चाःसां स्वन्हुया लागिं सेवा बन्द यानाः ज्याकुथी वासः छ्वाकेगु ज्या जूगु खः । सरकारी ज्याकुथी समेत कोरोना संक्रमित विरामीत खने दयेवं सरकारी ज्याकुथिं सर्वसाधारणयात बीगु सेवा समेत प्रभावित जुयाच्वंगु दु ।
LEAVE YOUR COMMENTS