गुथि जग्गाय् सी उइगु मेशिन

येँ/ पशुपति लागाय् पशुपति विकास कोषं स्थानीय निजी गुथिया जग्गाय् स्वंगू क्रिमेटोरियम दयेकेगु धकाः तयारी याःगुलिं सम्बद्ध गुथियारत तम्वःगु दु ।

छुं ई न्ह्यः तिनि कोषं अन स्वंगू क्रिमेटोरियम दयेकेगु लागिं येँ महानगरपालिकालिसे सम्झौता याःगु खः । तर उगु क्रिमेटोरियम दयेकेगु धकाः विकास कोषं छनौट याःगु जग्गा धाःसा स्थानीय देशोद्धार पुजा गुथियागु जुयाच्वंगु खँ सीदुगु दु । कोषं थःपिनिगु जग्गाय् सी उइगु मेशिन तयेगु धकाः निर्णय याःगु खँय् आपत्ति क्यँसें गुथियारतय्सं उकिया विरोध याःगु दु ।

पशुपति लागाय् रिंगरोडलिसे स्वाःगु थासय् देशोद्धार गुथियागु १३ रोपनी जग्गा लानाच्वंगु दु । उकिया पुर्जा समेत थःपिंके दुगु दावी गुथियारतय्सं यानाच्वंगु दु । आः तक कोषं अन क्रिमेटोरियम दयेकेगु धकाः गुथियात धाःगु मदुनिसा उगु जग्गा अधिकरण यायेगु छुं योजना नं दयेकूगु मदुनि । तर जग्गा निश्चित मजूसां कोषं धाःसा अन क्रिमेटोरियम दयेकेगु धकाः मनपालिसे सम्झौता समेत यायेधुंकूगु दु । थुकिया विरुद्ध आः गुथियारतय्सं कोष लिसें येँ मनपालिसे नं खँ ल्हायेगु जानकारी बिउगु दु ।

पशुपतिइ थौंकन्हय् स्वंगू क्रिमेटोरियम दुसा उकुन्हु तिनि सिँ तयाः सी उइगु विद्युतीय शवदाह गृहया उलेज्या जूगु खः । अन ११ गू दीप न्हापा हे दु । सी उइगु थाय् जक ग्वाःग्वाः दयेकाः पशुपतियात धार्मिकस्थल स्वयां नं ७५ गुलिं जिल्लाया सी उइगु मसानघाट अप्वः दयेकेत्यंगु द्वपं नं स्थानीय मनूतय्सं बियाहःगु दु ।