युरोपय् ग्यासया आपूर्ति पनेगु बेलारुसया ख्याच्वः

एजेन्सी- बेलारुसं आप्रवासी संकटया मामिलाय् युरोपेली संघं थःपिंत प्रतिबन्ध तल धाःसा ग्यासया आपूर्ति पनेगु ख्याच्वः बिउगु दु । पोल्याण्डलिसे स्वानाच्वंगु बेलारुसया पश्चिमी सिमानाय् इराक, सिरिया व यमनं वःपिं द्वलंद्वः शरणार्थीत तसकं ख्वाउँगु मौसमय् अलपत्रय् लानाच्वंगु दु । सिमानाय् हिमपात जुयाच्वंगु दुसा तापक्रम शून्य डिग्रीसिबें क्वय् दु । युरोपेली संघया अधिकारीतय्सं बेलारुसं संकटयात ल्ह्वनाच्वंगु, मानवअधिकारया हनन याःगु व सुरक्षा अवस्था स्यंकूगु द्वपं बिउगु दु, तर बेलारुसं धाःसा थ्व द्वपं अस्वीकार यानाच्वंगु दु ।

आप्रवासी संकटयात कयाः बेलारुसयात युरोपेली संघं सोमवाः निसें प्रतिबन्ध तइगु अन्तर्राष्ट्रिय सञ्चार माध्यमं जानकारी बिउगु दु, तर बेलारुसया राष्ट्रपति लुकासेन्कों थःपिंत प्रतिबन्ध तल धाःसा कडा लिसः बीगु ख्याच्वः बिउगु दु । बेलारुसं युरोपय् वनीगु ग्यास पाइपलाइनयात संकेत यासें राष्ट्रपति लुकासेन्कों युरोपय् जिमिसं यानाः मत च्यानाच्वंगु दु, लुमुयाच्वंगु दु धासें उकिं जिमित ख्याच्वः बीमते धासें अःखःबतं ख्याच्वः बिउगु खः ।

‘जिमिसं ग्यासया आपूर्ति पनाबिल धाःसा छु जुइ ? अथे जुयाः पोल्याण्ड, लिथुआनिया व खालि ल्हा च्वनाच्वंपिं देय्या नेतृत्वं नवाये न्ह्यः छकः बिचाः यायेत जिं सल्हा बी’ राष्ट्रपति लुकासेन्कों धाःगु दु ।

रुसं युरोपय् बेलारुसया लः जुयाः निगू पाइपलाइन वनाच्वंगु दु ।