चीनं हःपिं नेपालीयाके संक्रमण मदु

येँ – कोरोना भाइरस न्यनाच्वंगु चीनया वुहान सहरं उद्धार यानाहःपिं नेपाःमित सुयाकें नं भाइरस संक्रमण खनेमदुगु खँ धाःगु दु । स्वास्थ्य मन्त्रालयं म्हिगः छगू पत्रकार सम्मेलन यासें प्रवक्ता महेन्द्र श्रेष्ठं कोरोना भाइरस परीक्षणया निंतिं कयागु नमूनाय् सकसियां संक्रमण नेगेटिभ खनेदुगु खँ धयादीगु दु ।

वुहानय् च्वनाच्वंपिं १७५ म्ह नेपाःमितय्त वंगु आइतवाः उद्धार यानाः नेपाः हःगु खः । उमित थौंकन्हय् ख्वपया खरिपाटीइ च्वंगु विद्युत प्राधिकरणया तालिम केन्द्रय् क्वारेन्टाइनय् तयातःगु दु । क्वारेन्टाइनय् तयातःपिं सकसियां खैया नमूना मंगलवाः काःगु खः । थ्व खैया परीक्षण लिपा सुयाकें संक्रमण खनेमदुगु खँ प्रवक्ता श्रेष्ठं जानकारी बियादीगु खः ।

उमिगु खैया नमूना टेकुइ च्वंगु राष्ट्रिय जनस्वास्थ्य प्रयोगशालाय् याःगु खः । प्रयोगशालां मंगलवाः सनिलय् हे रिपोर्ट बिउगु खःसा बुधवाः पत्रकार सम्मेलन यासें उकिया जानकारी बिउगु खः ।

झिंप्यन्हु तक क्वारेन्टाइनय् तयातइपिं थुमित आः झिंप्यन्हुया न्हि कुन्हु नं हाकनं परीक्षण याइगु खँ धाःगु दु । उमित तयाहःगु नेपाल वायुसेवा निगमया जहाज धाःसा अन्तर्राष्ट्रिय मापदण्ड कथं ४८ घौया क्वारेन्टाइन लिपा मंगलवाः बहनी निसें ब्वकेगु सुरु याःगु दु ।